![\"\"](\"http:\/\/radiostargjilan.com\/web\/wp-content\/uploads\/2019\/06\/C29853DC-3224-4FE9-BBC1-6FFF08D217DF.jpeg\")
\nP\u00ebr Kosov\u00ebn, e till\u00eb ishte edhe periudha e viteve t\u00eb \u201990-ta, t\u00eb shekullit XX, koh\u00eb kjo e cila kishte arritur kulmin e zgjimit komb\u00ebtar p\u00ebr t\u2019u organizuar n\u00eb luft\u00eb p\u00ebr liri e pavar\u00ebsi, kundrejt okupator\u00ebve t\u00eb cil\u00ebt kah do q\u00eb shkonin, b\u00ebnin dhun\u00eb, terror, vrasje e agresion ndaj popullit shqiptar.
\nSot, ne banor\u00ebt e fshatit Dob\u00ebr\u00e7an, n\u00eb 20-t\u00eb vjetorin e \u00e7lirimit t\u00eb Kosov\u00ebs, me dhembje dhe krenari p\u00ebrkujtojm\u00eb 13 qershorin e vitit 1999, dat\u00eb n\u00eb t\u00eb cil\u00ebn ra d\u00ebshmor\u00eb p\u00ebr lirin\u00eb e Kosov\u00ebs, Mulla Nusret (Fejzullah) Hajdari.
\nHoxh\u00eb Nusreti u lind m\u00eb 1 tetor 1968 n\u00eb fshatin Dob\u00ebr\u00e7an t\u00eb Gjilanit, n\u00eb nj\u00eb familje me tradit\u00eb komb\u00ebtare e fetare. T\u00eb par\u00ebt e hoxh\u00eb Nusretit jan\u00eb me origjin\u00eb prej fshatit \u00c7arr t\u00eb Mal\u00ebsis\u00eb s\u00eb Bujanocit, t\u00eb cil\u00ebt u shp\u00ebrngul\u00ebn n\u00eb fshatin Dob\u00ebr\u00e7an t\u00eb Gjilanit n\u00eb vitet e \u201950-ta. Gjyshi i tij, haxhi Sylejmani, njihej si prij\u00ebs i fisit, pajtimtar i gjaqeve, patriot dhe nj\u00ebri nd\u00ebr vullnetar\u00ebt e Mal\u00ebsis\u00eb s\u00eb Hashanis\u00eb, n\u00eb mbrojtjen e kufirit lindor t\u00eb Kosov\u00ebs me Serbin\u00eb.
\nMulla Nusret Hajdari, shkoll\u00ebn fillore e kreu n\u00eb vendlindje, nd\u00ebrsa n\u00eb vitin shkollor 1988\/1989, mbaroi medresen\u00eb e mesme \u2018\u2019Alaudin\u2019\u2019 n\u00eb Prishtin\u00eb. Pas mbarimit t\u00eb medreses\u00eb u angazhua p\u00ebr nj\u00eb koh\u00eb t\u00eb shkurt\u00ebr n\u00eb detyr\u00ebn e imamit n\u00eb xhamin\u00eb e fshatit Pogragj\u00eb, ku e nd\u00ebrpreu p\u00ebr shkak t\u00eb shkuarjes n\u00eb sh\u00ebrbimin e detyruar ushtarak jugosllav t\u00eb asaj kohe. Pas kthimit n\u00eb vitin 1991, p\u00ebr nj\u00eb vit u em\u00ebrua imam n\u00eb xhamin\u00eb \u2018\u2019Atik\u2019\u2019 t\u00eb Gjilanit, nd\u00ebrsa, q\u00eb nga viti 1992, em\u00ebrohet imam i rregullt n\u00eb xhamin\u00eb e poshtme t\u00eb fshatit Dob\u00ebr\u00e7an, ku sh\u00ebrbeu deri n\u00eb momentet e fundit t\u00eb r\u00ebnies s\u00eb tij p\u00ebr lirin\u00eb e Kosov\u00ebs me 13 Qershor 1999.
\nHoxh\u00eb Nusreti, si duket kishte ndjekur idealet e atdhetarit t\u00eb madh Mulla Idriz Gjilanit, i cili dikur moti pati th\u00ebn\u00eb se: \u2018\u2019S\u2019ka Fe pa Atdhe\u2019\u2019, andaj edhe angazhimi i tij n\u00eb koh\u00ebt m\u00eb t\u00eb v\u00ebshtira p\u00ebr popullat\u00ebn e fshatit ton\u00eb ishte p\u00ebr t\u2019u dal\u00eb n\u00eb mbrojtje dhe t\u2019i p\u00ebrmbush\u00eb detyrat q\u00eb i takojn\u00eb nj\u00eb prij\u00ebsi t\u00eb devotsh\u00ebm komb\u00ebtar e fetar, ashtu si\u00e7 ishte Ai. Kjo veprimtari patriotike e hoxh\u00eb Nusretit, u kishte penguar armiqve serb\u00eb, andaj edhe e vran\u00eb n\u00eb krye t\u00eb detyr\u00ebs, me 13 Qershor 1999, kur e pan\u00eb se nuk t\u00ebrhiqej dot nga angazhimi dhe idealet e tij dhe t\u00eb shok\u00ebve me t\u00eb cil\u00ebt angazhoheshin s\u00eb bashku. N\u00eb momentet kritike, s\u00eb bashku me hoxh\u00eb Nusretin ishte edhe m\u00ebsuesi Basri Bislimi, i cili mbeti i plagosur s\u00eb bashku me kush\u00ebririn e hoxh\u00ebs, Hafiz Hajdari si dhe rrah\u00ebn e malltretuan aktivistin Hamdi Kastratin, haxhi Januzin, dhe disa familjar\u00eb e bashk\u00ebfshatar t\u00eb tjer\u00eb.
\nN\u00eb t\u00eb nj\u00ebjt\u00ebn dit\u00eb, kur forcat militare e paramilitare serbe e sulmuan Dob\u00ebr\u00e7anin gjat\u00eb t\u00ebrheqjes s\u00eb tyre p\u00ebr andej nga kishin ardhur si pushtues shekuj m\u00eb par\u00eb, ata dogj\u00ebn edhe xhamin\u00eb e ep\u00ebrme t\u00eb fshatit Dob\u00ebr\u00e7an, e cila ishte nj\u00ebra nd\u00ebr xhamit\u00eb m\u00eb t\u00eb vjetra t\u00eb Kosov\u00ebs, e nd\u00ebrtuar rreth vitit 1527. Banor\u00ebt u detyruan t\u00eb largoheshin nga sht\u00ebpit\u00eb e tyre, p\u00ebr t\u2019u strehuar n\u00eb periferi t\u00eb fshatit, e m\u00eb pas nj\u00eb pjes\u00eb e madhe e tyre nat\u00ebn e kaluan n\u00eb fshatin Malishev\u00eb t\u00eb Gjilanit.
\n\u200bHoxh\u00eb Nusreti u varros t\u00eb nes\u00ebrmen m\u00eb 14 qershor 1999, n\u00eb kushte t\u00eb jasht\u00ebzakonshme dhe pa ndonj\u00eb ceremoni t\u00eb madhe, p\u00ebr shkak se situata ende ishte e me plot rreziqe dhe nuk kishin lejuar q\u00eb pjes\u00ebmarrja n\u00eb ceremonin\u00eb e varrimit t\u00eb ishte e madhe dhe se duhej t\u00eb kryhej sa m\u00eb shpejt\u00eb.
\n\u200bPas p\u00ebrfundimit t\u00eb luft\u00ebs, fshati Dob\u00ebr\u00e7an i nderoi d\u00ebshmor\u00ebt Mulla Nusret Hajdarin dhe Mehmetali Behlulin, duke nd\u00ebrtuar Parkun e D\u00ebshmor\u00ebve, n\u00eb t\u00eb cilin \u00ebsht\u00eb ngritur lapidari, nd\u00ebrsa n\u00eb vazhdim\u00ebsi n\u00eb p\u00ebrvjetor\u00ebt e tyre ka organizuar dhe vazhdon t\u00eb organizoj\u00eb aktivitete me t\u00eb cilat p\u00ebrkujtohet jeta dhe vepra e tyre, n\u00eb shenj\u00eb fal\u00ebnderimi dhe mir\u00ebnjohje p\u00ebr sakrific\u00ebn e tyre sublime, p\u00ebr t\u00eb na sjell\u00eb lirin\u00eb e cila u fitua edhe me gjakun e tyre t\u00eb njom\u00eb.
\n\u200bEdhe sot, n\u00eb k\u00ebt\u00eb 20 vjetor, aktivist, kryetar\u00ebt e n\u00ebndeg\u00ebve t\u00eb partive politike, xhemati i dy xhamive n\u00eb krye me imamin e xhamis\u00eb s\u00eb ep\u00ebrme, familjar\u00ebt e d\u00ebshmorit Mehmetali Behlulit dhe shum\u00eb bashk\u00ebvend\u00ebs t\u00eb tjer\u00eb, nderuan jet\u00ebn dhe vepr\u00ebn e hoxh\u00eb Nusretit, duke b\u00ebr\u00eb homazhe pran\u00eb varrit t\u00eb tij, si dhe duke vizituar familjen.
\n\u200bLavdi jet\u00ebs dhe vepr\u00ebs s\u00eb Mulla Nusret Hajdarit!<\/p>\n