Katër persona kanë humbur jetën gjatë 24 orëve të fundit nga COVID-19 në Kosovë.
Këto raste janë konfirmuar nga zyrtarët komunalë, ndërsa viktimat janë 2 nga Ferizaj, 1 nga Skenderaj dhe 1 nga Podujeva.
Drejtori i shëndetësisë në Komunën e Ferizajt, Bekim Ademi, ka konfirmuar për “Zërin” se dy pacientë me COVID-19 kanë humbur jetën në mesditën e së mërkurës në Spitalin e Ferizajt.
“Janë dy persona që kanë vdekur sot në Spitalin e Përgjithshëm të Ferizajt, njëri është i vitit 1966 dhe tjetri 1944, për njërin ka pasur sëmundje shoqëruese, ndërsa për tjetrin ende nuk dihet nëse ka vuajtur nga ndonjë sëmundje”, ka thënë Ademi për “Zërin”.
Disa orë më vonë edhe kryetari i Skenderajt, Bekim Jashari, ka konfirmuar një të vdekur nga kjo komunë si pasojë e koronavirusit.
Jashari tha se viktima e dytë nga COVID-19 në Skenderaj është një veteran i UÇK-së, i cili ishte mirëmbajtës në shkollën fillore të mesme të ulët “Azem Bejta” në Prekaz.
Ndërsa sot rreth orës 12:00 nënkryetari i Podujevës, Nexhmi Rudari, ka njoftuar për një viktimë në komunën e tij.
“Miku im para disa ditësh kishte rezultuar pozitiv me virusin COVID-19, i cili pamëshirshëm po merr jetë njerëzish në mbarë botën, por edhe në vendin tonë. Në këto momente të dhimbjes së madhe jam me familjen Fetahu dhe bashkëndjej me ta”, ka shkruar Rudari në “Facebook”.
Ndryshe, IKSHPK-ja pritet që në orën 15:00 të dalë me raportin 24-orësh për numrin e të infektuarve, të shëruarve dhe viktimave.
