Sot mbushen saktësisht gjashtë vite nga 13 marsi i vitit 2020, dita kur Kosova u mbyll zyrtarisht në karantinë. Në këtë përvjetor, vëmendja kthehet te mobilizimi i jashtëzakonshëm i asaj kohe, ku ish-nënkryetari i Komunës së Gjilanit, Arbër Ismajli, u vlerësua si figura më aktive dhe produktive në shërbim të qytetarëve.
Më 13 mars 2020, Qeveria e Kosovës në koordinim me institucionet shëndetësore mori vendimin drastik për mbylljen e vendit. Brenda një nate, u mbyllën shkollat, restorantet, u kufizuan fluturimet dhe u vendos ora policore. Jeta u paralizua, ndërsa paniku dhe pasiguria ekonomike kapluan mijëra qytetarë të papërgatitur për një krizë të tillë globale, e cila ishte shpallur emergjencë nga OBSH-ja që në janar të atij viti.
Në këtë situatë alarmante, Arbër Ismajli, në cilësinë e Nënkryetarit të Komunës dhe Kryesuesit të Shtabit Operativ Emergjent në Gjilan, u bë mburoja e parë për qytetarët. Dëshmitë e kohës tregojnë se Ismajli kalonte me ditë të tëra pa shkuar në shtëpi, duke qëndruar në terren për të siguruar që asnjë familje të mos mbetej pa ndihmë.
Sot, pas gjashtë vitesh, Ismajli e kujton atë periudhë me emocione:
“Ishte një periudhë shumë e vështirë, një pandemi vdekjeprurëse ku e gjithë bota ishte e papërgatitur. U mobilizuam urgjentisht me Spitalin, Policinë, inspektorët dhe vullnetarët. Qëllimi ynë i vetëm ishte ofrimi i ushqimit dhe sigurisë për familjet. Qytetarët shpesh i quaja ‘bashkëluftëtarë’ në atë betejë që mori shumë jetë,” shprehet ai.
Një pjesë kyçe e këtij suksesi ishte bashkëpunimi me sektorin privat. Ismajli përcjell një falënderim të madh e të veçantë për të gjitha bizneset që kontribuan dhe u sakrifikuan për të ndihmuar qytetarët në ato ditë kritike, duke u bërë krah i fortë i shtabit emergjent në shpërndarjen e ndihmave.
Puna e tij nuk kaloi pa u vënë re. Organizata e Shëndetësisë në Kosovë e shpalli Ismajlin si njeriun më produktiv në nivel vendi gjatë pandemisë. Mirënjohja e qytetarëve u konkretizua edhe me botimin e dy librave që dokumentojnë aktivitetin e tij gjatë muajve kritikë.
Në këtë përvjetor, Ismajli ka një porosi për gjilanasit:
“Ju shpreh ngushëllimet më të thella familjeve që humbën të dashurit e tyre. Jam krenar që ndamë këtë pjesë të vështirë të jetës së bashku. Jam i nderuar që m’u dha mundësia t’ju vizitoja në çdo fshat e lagje; ju faleminderit që isha pjesë e juaj.”
Sipas të dhënave statistikore, bilanci i COVID-19 mbetet i rëndë ku në Kosovë u regjistruan 273,000 të prekur dhe 3,300 viktima, ndërsa vetëm në Gjilan u shënuan 12,000 të prekur, 11,500 të shëruar dhe 160 qytetarë që humbën betejën me virusin, përderisa në nivel botëror shifrat arritën në mbi 84 milionë të infektuar dhe rreth 2 milionë jetë të humbura gjatë valëve të para të pandemisë.
Edhe sot, gjashtë vite pas asaj dite të errët të marsit, Arbër Ismajli vazhdon të gëzojë respektin e lartë të banorëve të Gjilanit për përkushtimin e treguar kur rreziku ishte në kulm.
