Prishtinë- Dogana e Kosovës ka marrë vendim për largim e një zyrtari doganor nga puna, pasi ndaj tij ekziston dyshimi i bazuar për keqpërdorim të pozitës apo autoritetit zyrtar.
Lajmi u bë i ditur përmes një komunikate nga Dogana, ku thuhet se në një rast në Vërmicë, zyrtari doganor ka bërë shkelje serioze të Kodit të Etikës, gjatë ushtrimit të detyrës zyrtare, raporton “Betimi për Drejtësi”.
“Provat e administruara nga Dogana e Kosovës lidhur me rastin i cili ka ndodhur në pikalimin kufitar të Vermicë janë të qarta për vërtetuar se zyrtari doganor gjatë ushtrimit të detyrave të punës ka bërë shkelje serioze të kodit të etikës, e të cilat janë të pa pranueshme për sistemin e standardeve dhe vlerave që përfaqëson Dogana e Kosovës si institucion publik”, thuhet në njoftim.
Dogana bën thirrje që në rast se qytetarët shohin ndonjë rast të sjelljes joetike të zyrtarëve doganor ta paraqesin atë.
“Dogana e Kosovës është e përkushtuar që të mos lejoj asnjë shkelje të procedurave dhe të gjithë zyrtarët tonë të jenë në nivelin më të lartë të detyrës. Dogana e Kosovës fton qytetarët të njoftojnë secilin rast të sjelljes jo etike të zyrtarëve doganor në numrin e telefonit 080050095. Dogana e Kosovës rishtazi ka lansuar aplikacionin eDogana për pajisjet e mençura android, i cili mundëson lajmërim të parregullsive dhe sjelljeve jo profesionale me komunikim të sigurt dhe gjithashtu ofron shërbime tjera, qe synojmë ti zgjerojmë ne te ardhmen, me qëllim të shërbimit të qytetarëve dhe komunitetit të prodhuesve dhe tregtisë në përgjithësi”, thuhet në fund të komunikatës. /BetimipërDrejtësi
