Sot u mbushën 3 vita nga vdekja e mjekut të njohur në Anamoravë, Dr. Feti Hetemi
Shëndetësia kosovare dhe Anamorava me 19 gusht të vitit 2020 humbi njërin nga mjekët më të përgatitur në fushën e internos dhe nefrologjisë, Dr. Feti Hetemin nga Vitia.
Në përvjetorin e tretë të ndarjes nga jeta, Fondacioni i themeluar me emrin “Dr. Feti Hetemi” ka ndarë dy bursa studentore për vitin 2023, duke u bazuar në kriteret e publikuara në thirrjen për aplikim nga studentët e mjekësisë së drejtimit mjekësi e përgjithshme.
Komisioni vlerësues i përbërë nga Dr. Arsim Emini, drejtor në Spitalin regjional të Gjilanit, Dr. Valdrin Hetemi, përfaqëses i familjes së mjekut të ndjerë dhe Shyqeri Halabaku nga Shoqëria Civile kanë përzgjedhur si fituese të bursave për vitin 2023 studentet e mjekësisë, Entela Beqiri dhe Eldina Oruglica nga Gjilani, të cilat kanë përmbushur kriteret e parapara.
Kush ishte Dr. Feti Hetemi?
Dr. Fetiu, përveç profesionalizmit të tij në fushat e internos dhe nefrologjisë, ai njihej si gardian i të drejtave të shqiptarëve në rajonin tonë. Ai gjatë viteve 90-ta nuk pushoi së kontribuuari për popullatën shqiptare. Dr. Hetemi së bashku me kolegët e tij themeluan Shoqatën Humanitare “Nëna Terezë” në Viti, të cilën e udhëhoqi për disa vite. Në kuadër të kësaj shoqate, u funksionalizuan ambulantat në Viti, Pozheran, Remnik, Stubëll etj, në shërbim të popullatës shqiptare, për të cilën veprimtari ai u persekutua e u pengua nga regjimi pushtues serb.
Mjeku nga Anamorava, gjatë viteve 80-ta sa ishte delegat në Kuvendin e Kosovës, ishte iniciator dhe ndër themeluesit e repartit të Hemodializës në Spitalin regjional të Gjilanit.
Dr. Hetemi ishte i angazhuar zyrtarisht me detyrë edhe në ZOK të UÇK-së, i cili gjatë luftës së vitit 1999 dha kontribut të jashtëzakonshëm në trajtimin e ushtarëve të UÇK-së, të cilët fal angazhimit të tij, sot gëzojnë shëndet të plotë. Dr. Feti Hetemi në rajonin e Anamoravës përveç që njihet si mjek që ka shëruar mijëra pacientë, ai u shqua për virtyte të larta humane dhe kombëtare, duke mbrojtur vazhdimisht kauzën kombëtare dhe çështjen e Kosovës.
Regjioni i Anamoravës tre vite më parë humbi një mjek specialist të zemrës dhe veshkave.
ADVERTISEMENT
Dr. Hetemi për kontribut të veçantë u dekorua post-mortem nga Presidentja e Republikës së Kosovës, Vjosa Osmani dhe nga i pari i Komunës së Vitisë, Sokol Haliti.
Dr. Feti Hetemi, do të mbetet në histori si pishtari i humanizmit dhe shëndetësisë vitiase, i cili misionin e tij për shpëtim të jetëve e mbylli me vetëmohim, kur edhe shkoi në amshim më 19 gusht të vitit 2020.
Më poshtë mund të ndiqni dokumentarin “Përtej…” të autorit Tefik Salihu, i cili flet për jetën dhe veprimtarinë e tij./PlusTV/
