Presidenti francez Emmanuel Macron bëri bujë javën e kaluar kur sugjeroi që regjimi pa viza i Kosovës, i vendosur të hyjë në fuqi nga 1 janari 2024, mund të rishikohet nga Parisi dhe Berlini nëse Prishtina nuk bie në linjë për tensionet e vazhdueshme me Serbinë.
Siç raporton Euractiv Gjermania do t’i përmbahet afatit kohor fillestar, duke sugjeruar një divergjencë në qëndrim midis dyshes franko-gjermane.
Ndërsa Macron tha se ata po presin për një “angazhim të qartë” nga të dyja palët, duke përfshirë zgjedhjet e reja komunale, një riangazhim serb ndaj institucioneve të lidhura dhe një qetësim të përgjithshëm të situatës, ai shkoi më tej dhe lëshoi një ultimatum.
Macron tha: “Franca dhe Gjermania janë të përkushtuara dhe kanë bërë gjithashtu lëvizje për t’u hapur, veçanërisht për politikën e vizave dhe çështje të tjera ekonomike, të cilat do të rishikohen nëse nuk ka një politikë përgjegjësie nga të dyja palët”.
Sugjerimi se Franca dhe Gjermania do të rishikonin politikën e vizave shkaktoi valë tronditëse në Prishtinë pasi liberalizimi i vizave ka qenë një betejë e luftuar për një kohë të gjatë për shpresën në BE, shkruan mediumi.
Ndërkohë Scholz nuk ka bërë asnjë deklaratë publike të ngjashme.
I pyetur nëse Macron dhe Scholz kishin rënë dakord bashkërisht për rishikimin e mundshëm të sistemit të liberalizimit të vizave, një burim i afërt me Ministrinë e Jashtme gjermane tha për EURACTIV se “Gjermania i nënshtrohet rregulloreve të miratuara nga BE-ja në prill të vitit 2023. Sipas tyre, shtetasit kosovarë në të ardhmen do të përjashtohen nga kërkesa për vizë për qëndrime të shkurtra në zonën Shengen (deri në 90 ditë brenda 180 ditëve). Kjo do të hyjë në fuqi më 1 janar 2024. Kjo do të thotë se të gjitha shtetet e Ballkanit Perëndimor më pas do të përjashtohen njëlloj nga kërkesa për vizë për qëndrime të shkurtra në zonën Shengen”, duke refuzuar të zgjerohet më tej për këtë çështje.
Megjithatë, siç raporton ky medium Gjermania do të qëndrojë në afatin e 1 janarit 2024 dhe nuk ka plane për të devijuar nga kjo rrugë, që do të thotë se përfshirja e Gjermanisë nga Macron në deklaratën e tij është bërë pa marrëveshjen e Berlinit.
Më 30 gusht presidentja e vendit, Vjosa Osmani duke komentuar deklaratën e Macron ka thënë se pezullimi i vendimit për heqje të vizave për qytetarët e Kosovës nga 1 janari i vitit 2024, do ta vriste dialogun mes Kosovës dhe Serbisë.
Ajo i ka bërë këto deklarata, duke iu referuar qëndrimit të presidentit francez, Emmanuel Macron, i cili ka thënë më 28 gusht se vendi i tij do t’i rishikojë zotimet që i ka bërë për çështje ekonomike dhe politika të vizave për Kosovën dhe Serbinë, nëse ato nuk sillen me përgjegjësi.
“Unë do të thosha që kjo është mënyra për ta vrarë dialogun një herë e përgjithmonë. Në qoftë se dëshiron dikush që të mos ketë më dialog, atëherë ndërmerr masa të tilla, që janë masa ndëshkuese ndaj popullit të Kosovës. Nuk janë ndaj ndonjë lideri, nuk janë ndaj një politike, janë ndaj popullit të Kosovës. Dhe një ndëshkim i tillë i paprecedentë, që edhe ashtu ka qenë padrejtësi e madhe për popullin e Kosovës, do të rezultojë me vdekjen e dialogut. Nuk ka më askush mandat që të shkojë në Bruksel, kur populli i Kosovës ndëshkohet”, ka thënë Osmani.
Të hënën e 28 gushtit, Presidenti i Francës, Emmanuel Macron në fjalimin e tij para ambasadorëve francezë nëpër botë foli edhe për dialogun Kosovë-Serbi, derisa kërkoi angazhim për zgjedhjet në komunat veriore, poashtu riangazhim i serbëve në institucionet e Kosovës, ndërsa shpreson se paqja të kthehet në Veri të vendit.
Presidenti francez ka paralajmëruar masa ndaj Kosovës e Serbisë nëse ato “nuk sillen me përgjegjësi”.
“Franca e Gjermania kanë bërë zotime sa i përket politikave të vizave dhe çështje tjera ekonomike, të cilat do të rishikohen nëse palët dështojnë të sillen me përgjegjësi”, shtoi Macron./Reporteri.net/
