“Vjet çika e ka humb klasën e parë, s’kemi pas transport me çu n’shkollë”
Që nga viti i kaluar, shkolla fillore në fshatin Debelldeh të Vitisë, nuk ofron mësim për nxënësit e fshatit.
Banorët thonë se shkolla është mbyllur për shkak se kishte mbetur me pak nxënës.
Në Drejtorinë Komunale të Arsimit në Viti, thonë për PlusTV se kishin marr vendim për ta pezulluar mësimin për arsye të numrit të vogël të nxënësve por ende nuk ka vendim për mbyllje të shkollës.
Sipas DKA-së, sivjet janë lajmëruar vetëm tre nxënës në këtë fshat të cilët janë bartur për në shkollën fillore “Ndre Mjeda” në fshatin Kabash të kësaj komune.
Prindërit e këtyre nxënësve po kërkojnë që komuna të ua sigurojë transportin.
Kadri Rrahmani, prind, ankohet se vjet vajza e tij e humbi klasën e parë sepse nuk kishte transport.
Ai shprehet se tani prindërit vetë po i bartin fëmijët nga Debëlldehu për në shkollën e Kabashit.
“Shkolla vjet u mbyll, çika e humbi klasën e parë se nuk kisha automjet me çu në shkollë në Kabash, nga komuna s’ka pas transport hiq, kërkojmë që sivjet të ketë një kombibus që t’i bartë fëmijët, tashti vet po e çoj në shkollë në Kabash dhe duhet me shku me marr.” thotë ai.
Njëjtë si Rrahmani shprehet edhe një prind tjetër që thotë se që kur ka nisur mësimi po i bartë çdo ditë dy fëmijët e tij për në Viti, për ta vijuar mësimin.
PlusTV ka kontaktuar një familje tjetër që jeton në lagjen Shaqiraj larg qendrës së fshatit, por ata nuk ishin të qasshëm të hënën. Edhe kjo familje me dy fëmijë po ashtu, ka kërkuar nga komuna që t’ua paguaj transportin.
Ndërkaq, zyrtarë të drejtorisë së Arsimit thonë se është rishpallur tenderi për të kontraktuar një operator që të kryejë transportin e nxënësve në relacionin Debëlldeh – Kabash dhe presin që këto ditë ky problem të zgjidhet.
Debëlldehu është fshat pranë kufirit me Maqedoninë e Veriut, rreth 13 km larg Vitisë./PlusTV/
