Kryeqyteti i Kosovës mirëpriti përfaqësues të lartë të botës së biznesit shqiptar, të ardhur nga vende të ndryshme, në një forum dyditor të organizuar nga Rrjeti Global i Bizneseve Shqiptare.
Ky takim gjithëpërfshirës shërbeu si një pikë takimi për shkëmbim përvojash, forcim të bashkëpunimit ekonomik dhe ndërtim të marrëdhënieve të reja ndërmjet sipërmarrësve shqiptarë, si në diasporë, ashtu edhe në vendet shqiptare.
Në qendër të diskutimeve ishin:
•Thellimi i bashkëpunimit ekonomik ndërshqiptar
•Rritja e prezencës së bizneseve shqiptare në tregjet ndërkombëtare
•Promovimi i investimeve dhe rrjeteve të qëndrueshme të bashkëpunimit
Të pranishmit vinin nga fusha të ndryshme si industria, teknologjia, shërbimet dhe tregtia, dhe të gjithë ndanë bindjen se bashkëpunimi i strukturuar është çelësi për sukses të qëndrueshëm në një treg global gjithnjë e më konkurrues.
Gjatë forumit u organizuan sesione diskutimi, prezantime nga sipërmarrës me përvojë dhe histori suksesi, si dhe aktivitete të dedikuara për rrjetëzim profesional. Pjesëmarrja aktive dhe interesimi i lartë konfirmuan rëndësinë që ky rrjet po merr në bashkimin e kapaciteteve shqiptare kudo ku ndodhen.
Ky forum dëshmoi edhe një herë se Rrjeti Global i Bizneseve Shqiptare po shndërrohet në një faktor kyç për afrimin e diasporës me atdheun, si dhe për forcimin e rolit ekonomik të shqiptarëve në arenën ndërkombëtare./Radio Star/
