Kandidati për kryetar të Gjilanit, Arbër Ismajli, ka shprehur shqetësimin për sfidat me të cilat janë përballur gastronomët në qytet, duke nisur nga goditja e rëndë e pandemisë e deri te politikat jo të favorshme të qeverisjes aktuale.
Ai ka thënë se është koha për një qasje më të drejtë dhe të qëndrueshme ndaj këtij sektori që, sipas tij, luan rol kyç në zhvillimin ekonomik, krijimin e vendeve të punës dhe jetën kulturore e sociale të qytetit.
Statusi i plotë:
Gastronomët tanë kanë kaluar sfida të mëdha që nga pandemia që i goditi rëndë, e deri te politikat jo të favorshme të qeverisjes aktuale. Prandaj është koha të sigurohet një qasje më e drejtë ndaj tyre. Duhet të ketë një orar pune të qëndrueshëm e të pandryshueshëm, që të mos dëmtohet kjo kategori që gjeneron ekonomi dhe vende pune për qindra familje. Të krijohet një rregullore e balancuar për ndotjen akustike, që të jetë në favor të gastronomëve, por edhe të qytetarëve për t’u siguruar që lokalet të funksionojnë lirisht, ndërsa qytetarët të kenë qetësinë e tyre. Gjilani ka një rini dhe qytetarë që kanë nevojë për argëtim, relaks dhe hapësira të lira kulturore e sociale, e gastronomia është pjesë e rëndësishme e kësaj jete. Është koha vendimtare që gastronomët të përkrahen fuqishëm, sepse përmes tyre përkrahet zhvillimi ekonomik, turizmi, kultura e argëtimit dhe vetë qyteti ynë.
#BashkePerFitore👓
#BashkePerGjilan
