Në Podujevë është zhvilluar njëra nga ndeshjet më interesante të javës në xhiron e 7-të të Superligës së Kosovës, ku Llapi ka shënuar një fitore të thellë ndaj Gjilanit, me rezultat bindës 4-1.
Skuadra llapjane dominoi nga fillimi deri në fund, duke mos i lënë asnjë hapësirë kundërshtarit dhe duke i dhënë tifozëve të pranishëm një paraqitje për t’u mbajtur mend. Për Gjilanin, kjo humbje është goditje e rëndë, pasi vjen menjëherë pas disfates së pësuar javën e kaluar në shtëpi ndaj Drenicës.
Me këtë rezultat, Gjilani mbetet në kuotën e 7 pikëve, ndërsa forma e skuadrës ka filluar të shqetësojë seriozisht tifozët dhe drejtuesit. Sfida e radhës nuk premton aspak lehtësi, pasi në xhiron e 8-të gjilanasit përballen me rivalin e qytetit, Dritën.
