Të nderuar anëtarë dhe aktivistë të LVV! në Gjilan,
Ashtu si jeni në dijeni, Këshilli i Qendrës dhe strukturat tjera udhëheqëse të LVV, kanë miratuar kandidaturat e dy kandidatëve për Kryetar të Qendrës në Gjilan. Njëri kandidat është profesori Nevzad Isufi, dhe kandidati tjetër jam unë, Ali Xhelili, doktorant i letërsisë dhe mësimdhënës universitar i gjuhës angleze. Është hera e parë që përfshihem aktivisht në politikë dhe kam zgjedhur të bëhem aktivist i denjë i LVV!
Paraqitjen time si kandidat për Kryetar të Qendrës, dua të filloj me konstatimin se Qendra jonë, e dyta për nga rëndësia për LVV në tërë Kosovën, më shumë se kurrë më parë, ka nevojë dhe meriton një çasje dhe frymë të re në strukturat e saj udhëheqëse, një udhëheqësi me vizion dhe mision të qartë për LVV. Ju, më mirë se kushdo tjetër, e dini se një gjë e tillë mund të arrihet vetëm përmes një përfaqësimi të denjë, profesional, aktiv dhe energjik të Qendrës së LVV në Gjilan. Përvoja ime jetësore dhe profesionale i garanton këto gjëra. Jam i vetëdijshëm se të gjitha këto dhe shumë të tjera mund të arrihen vetëm përmes përkushtimit, punës, respektit dhe bashkëpunimit të ndërsjellë të aktivistëve në të gjitha nivelet e LVV! dhe kjo është ajo çfarë mëtoj të bëjë për Qendrën tonë.
Platforma ime për udhëheqjen e Qendrës, me moton “Reformatim përmes intelektualizimit”, e mbështetur në platformën e Kryetarit të LVV, z. Albin Kurti, garanton fillimisht konsolidimin e pastaj forcimin, rritjen dhe zgjerimin e LVV. Si e tillë, kjo platformë specifike për Qendrën tonë garanton fitore të sigurtë në zgjedhjet e ardhshme lokale. Me fjalë të tjera, fati i LVV në Gjilan dhe fitorja në zgjedhjet e ardhshme lokale mbështetet në jetësimin e kësaj platforme.
Meqenëse Ju do të votoni për Kryetar të Qendrës, me votat Tuaja do të vendosni për kahjen dhe të ardhmen e LVV. Është në ndërgjegjen dhe duart Tuaja nëse jeni për Lëvizje të shëndoshë, të fortë, të dinjitetshme dhe fitimtare. Kësaj radhe do të votoni për vete, jo për të tjerët.
Prandaj, ju ftoj të gjithëve që të dilni të votoni për Kryetarin e Qendrës dhe Kryetarin e ardhshëm të Komunës së Gjilanit!
Me shumë respekt për secilin nga Ju,
Ali Xhelili
