Pingpongistja e re kosovare, Zana Bllaca, ka përfaqësuar Kosovën në turneun prestigjioz ndërkombëtar STIGA Masters U11, të zhvilluar më 24 dhe 25 tetor 2026 në Blegny të Belgjikës, pranë qytetit të Lièges.
Bllaca u bë pingpongistja e parë nga Kosova e ftuar zyrtarisht në këtë turne, i cili mbledh talentet më premtuese të pingpongut evropian në kategorinë deri në 11 vjeç.
Në garat ku morën pjesë 14 vajza dhe 14 djem, Zana regjistroi katër fitore dhe pesë humbje gjatë dy ditëve të konkurrimit. Ajo e përfundoi turneun në vendin e 10-të nga 14 garuese, duke treguar paraqitje konkurruese përballë pingpongisteve të reja nga vende të ndryshme evropiane.
Përtej rezultatit, kjo pjesëmarrje përbën një përvojë të rëndësishme për zhvillimin e saj sportiv, duke i dhënë mundësinë të matë nivelin e saj me talentet ndërkombëtare dhe të fitojë përvojë në gara të një niveli të lartë.
Gjatë turneut, Bllaca u shoqërua dhe u udhëhoq nga trajneri Naser Hasani, i cili kontribuon në përgatitjen dhe zhvillimin e saj sportiv. Në rrugëtimin e saj rëndësi të veçantë kanë edhe mbështetja e familjes dhe përkrahja e Federatës së Pingpongut të Kosovës (FPPK).
Pjesëmarrja e Zanës në STIGA Masters U11 shënon një përvojë të rëndësishme për pingpongun kosovar dhe dëshmon potencialin e sportistëve të rinj për të përfaqësuar vendin në arenën ndërkombëtare.
