Në kampin e njësive speciale të Policisë së Kosovës – Vrellë, me pjesëmarrje nga Policia e Kosovës, KFOR- i, EULEX-i, FSK-ja, AME-ja dhe Shërbimet Shëndetësore, është mbajtur ushtrimi i përbashkët operacional “Shpata e artë”.
Qëllimi i këtij ushtrimi të përbashkët ishte fuqizimi i bashkëpunimit dhe koordinimit për reagim emergjent në raste të incidenteve kritike, situatave kur kërkohet angazhim dhe bashkëpunim ndërinstitucional në ruajtjen e sigurisë publike, duke reflektuar bashkëpunimin shumë të mirë institucional dhe përpjekjet e përbashkëta për të garantuar një ambient të sigurt, si dhe për të siguruar një reagim të shpejtë, efikas dhe efektiv ndaj çdo sfide të mundshme në aspektin e sigurisë.
Ushtrimi “Shpata e artë” u ndoq nga afër nga U. D. Drejtori i Përgjithshëm i Policisë së Kosovës kolonel Fehmi Hoti, Zëvendëskomandanti i KFOR-it gjeneral brigade Onur Çakici, shefi i EULEX-it Antero Lopes, përfaqësues të FSK-së, AME-së dhe Shërbimeve shëndetësore, si dhe eprorë të lartë nga Policia e Kosovës.
Në fund të këtij ushtrimi pjesëtarët e të gjitha institucioneve pjesëmarrëse, u përgëzuan për angazhimin dhe profesionalizmin e treguar gjatë ushtrimit, e në veçanti për bashkëpunimin ndër-institucional, si dhe gatishmërinë e lartë për ofrimin e një mjedisi të qetë dhe të sigurt për të gjithë qytetarët e Republikës së Kosovës pa dallim.










