Ministri i Shëndetësisë, Armend Zemaj, ka thënë se masat e marra nga Qeveria e Kosovës dhe Ministria e Shëndetësisë në menaxhimin e pandemisë COVID-19, kanë filluar të prodhojnë rezultate pozitive.
Përmes një postimi në faqen e tij në rrjetin social Facebook, Zemaj ka thënë se ky është rezultat i kujdesit të qytetarëëve dhe respektimit të masave.
Ai ka thënë se presin që këto rezultate të përmirësohen edhe më tej me qëllim që të lehtësohet puna e profesionistëve dhe të ruhet shëndeti i popullatës.
Ky është postimi i plotë i tij:
Qytetarë të dashur,
Masat e ndërmarra nga Qeveria e Republikës së Kosovës /Ministria e Shëndetësisë në menaxhimin e pandemisë Covid-19 kanë filluar të prodhojnë rezultate pozitive. Ky është rezultat i kujdesit që keni manifestuar ditëve të fundit duke bartuar maska mbrojtëse, ruajtur distancën fizike, mbajtur higjienën personale e kolektive dhe mbi të gjitha duke ngritur nivelin e përgjegjësisë dhe të sjelljes përballë një rreziku siç është Covid-19. Ne presim që këto rezultate të përmirësohen edhe më tej, ndërsa, përgjegjësia na thërret që të vazhdojmë me disiplinë, kujdes, zbatim edhe më rigiroz të masave e rekomandimeve të profesionistëve me qëllim që puna e personelit shëndetësor dhe shërbimeve të tjera të lehtësohet dhe shëndeti i popullatës të ruhet.
Mos u Shliro!
Bashkë për shëndetin e të gjithëve!
