Situata me pandeminë COVID-19 po shkon duke u rritur vazhdimisht dhe autoritetet përgjegjëse po deklarojnë se gjendja po rëndohet.
Si rezultat i rritjes së madhe të numrit të rasteve pozitive me COVID-19, të gjitha spitalet rajonale të Kosovës janë mbushur me pacientë dhe nuk po ka më shtretër të lirë, në Klinik Infektive në Prishtinë nuk ka më vende.
Pandemia e Covid-19 vijon të rritet me ritme të shpejta në Kosovë, ndërsa në dy ditët e fundi 31 qytetarë kanë humbur jetën. Kjo panoramë e zymtë ka shqetësuar autoritete shtetërore, të cilat kanë deklaruar se situata është tepër e rëndë.
Kryetar i Odës së Mjekëve të Kosovës, Pleurat Sejdiu, tha në Euronews Albania se gjendja në Kosovë mbetet e rëndë. Sipas tij, shkalla e infektimeve është shumë e madhe jo vetëm në popullatën e gjerë, por edhe në personelin shëndetësor.
“E vërteta është se tani po mbajmë nën kontroll çfarë mund të mbajmë nën kontroll. Na brengosin shumë infektimet në popullatë, por edhe në personelin shëndetësor, që është alarmante në këtë moment”, tha ai.
Doktor Sejdiu dha alarmin se sistemi shëndetësor në Kosovë ndodhet në prag kolapsi.
“Detyra e shtetit është të marrë masa që janë të rekomanduara nga profesionistët shëndetësorë, por detyra më kryesore e politikës është të monitorojë respektimin e këtyre masave. Strukturat kanë hezituar për përdorin dorën e fortë, dhe këto masa janë injoruar. Në masë të madhe respektimi i masave lë shumë për të dëshiruar. Masat janë injoruar dhe prandaj kemi një situatë të tillë. Ne jemi në buzë të një kolapsi në sistemin shëndetësor”, shtoi ai.
Po ashtu edhe ushtruesi i detyrës së drejtorit të Shërbimit Spitalor Klinik Universitar të Kosovës, Valbon Krasniqi thotë se gjendja me koronavirus në vend është duke u rënduar çdo ditë e më shumë. Sipas tij nga gjithsej 600 pacientë sa janë të shtrirë në klinikat e QKUK-së dhe spitalet regjionale, 400 prej tyre janë me oksigjenoterapi.//gazetametro.net
