Ministria e Ndërtimit, Transportit dhe Infrastrukturës e Serbisë përmes një deklarate për media, dhënë agjencisë së lajmeve Evropa e Lirë, ka thënë se në marrëveshjen e 4 shtatorit e nënshkruar në mes të Kosovës dhe Serbisë përveç autostradës Nish – Merdarë – Prishtinë e gjatë rreth 100 kilometra, është e përfshirë edhe një autostradë tjetër e cila do të lidhë Kosovën me Serbinë, përmes Bujanoc – Konçul – Gjilan – Shtërpcë, e gjatë 78 kilometra, projekte këto në kuadër të Korporatës Ndërkombëtare të Financave dhe Zhvillimit në SHBA, e cila kap shumën prej 3.7 miliardë eurosh.
Nga ajo që është mësuar deri tani duket se kjo autostradë e re nuk do të përshkojë territorin e Vitisë, pasi në raportimet se kah do të kalojë ky projekt infrastrukturor mes Kosovës dhe Serbisë, nuk përmendet fare rajoni i Vitisë.
Tani kur është hapur tema e ndërtimit të kësaj autostrade me trase tërësisht të re, Bujanoc – Konçul – Gjilan – Shtërpcë e gjatë 78 kilometra, ngrihen pikëpyetje se a do të kalojë edhe nëpër Viti, edhe pse gjeografikisht një gjë e tillë duhet të ndodhë.
Ndonëse ende nuk ka prezantim të projektit dhe as studim të fizibilitetit nga ana e institucioneve kosovare, megjithatë në Viti, qytetarët mirëpresin këtë investim me idenë se do të kenë qasje pasi lidhja me rrugët ndërkombëtare do të ndikojë në zhvillimin e kësaj pjese të Kosovës e mbetur si e izoluar në krahasim me qendrat e tjera.
Mungesa e qasjes në rrugë ndërkombëtare, ka dëmtuar edhe zhvillimin ekonomik të kësaj komune, pasi shqetësime të tilla ishin ngritur nga përfaqësues të bizneseve, institucioneve komunale e të shoqërisë civile qysh në kohën kur kjo komune u la pa qasje në autostradën Prishtinë-Shkup, projekt ky tashmë i përfunduar.
Kujtojmë se, nga investimet tjera qeveritare nuk janë marrë parasysh interesat e Vitisë, sidomos në rastin e autostradës Prishtinë – Shkup, që ndonëse ishte paraparë të kalonte përgjatë fshatit Vërban të Vitisë dhe Begracës së Kaçanikut, si opsioni më i lirë nga studimi i fizibilitetit që e përfundoi kompania franceze, kjo nuk ndodhi. Ky variant u hodh poshtë nga interesat klienteliste të qeveritarëve dhe traseja e kësaj autostrade u devijua dhe përfundoi me ura gjigante në zonën e Hanit të Elezit, me kosto marramendëse kinse në emër të veprave të artit infrastrukturorë.
Për më tepër, Vitisë nuk ju la opsioni i kyçjes së saj në këtë autostradë në pikën më të afërt në fshatin Gërlicë të Ferizajt, pasojë kjo që po detyron bizneset dhe njerëzit të shpërngulen më afër lidhjeve ndërkombëtare.
Territori i kësaj komune, nuk ka qasje direkte në autostradat e vendit dhe deri më sot është anashkaluar nga të gjitha arteriet kryesore të qarkullimit të njerëzve dhe mallrave.
Nga shoqëria civile lokale, konsiderojnë se është momenti i fundit kur duhet mobilizim nga të gjithë akterët relevant që kjo trase të kaloj doemos afër qytetit të Vitisë, në interes të qytetarëve dhe zhvillimit ekonomik.
Sipas shoqërisë civile, kjo autostradë mes Kosovës dhe Serbisë, është rast i mirë dhe bën edhe më të arsyeshme nevojën për hapjen e pikës kufitare me Maqedoninë përmes fshatit kufitar Debelldeh, si lidhje të Vitisë me vendet e rajonit./PlusTV/
