Në kohën kur shqiptarët arrestoheshin dhe dënoheshin me shumë vite burg nga pushteti serbo-sllav vetëm për dy shkronja KR (Kosova Republikë v. j.), pas demonstratave të vitit 1981, ishte dikush që e sfidoi këtë rrezik, duke ua servuar në tavolinë këtë parullë udhëheqjes komuniste të kohës, edhe atë në një mënyrë shumë interesante dhe kreative.
Një rast i tillë dhe mjaftë i guximshëm kishte ndodhur në vitin 1982, në hotelin Kristal në Gjilan, nga kuzhinieri Veli Kërqeli, i cili kishte përgatitur një sallatë për strukturat komuniste të asaj kohe, në krye me Mahmut Bakallin.
Veprimi i atëhershëm i Kërqelit i kishte mahnitur të gjithë kolegët e tij kuzhinierë dhe kamerierë, të cilët kishin mbetur të shtangur me idenë dhe guximin e tij për të dekoruar sallatën për këta “mysafirë” me dy shkronjat e famshme KR.
Kërqeli, me një fantazi të paparë, kishte marrë guximin dhe e kishte shkruar mbi pjatën e mbushur përplot me sallatë edhe mbishkrimin ‘Kosova Republikë’ dhe ju kishte kërkuar kamerierëve që ta servojnë pjatën e tillë.
Ndonëse kishin kaluar disa minuta, meqë kishte pasur hezitim dhe frikë nga kamerierët, duke refuzuar dhe frikësuar për të servuar një pjatë të tillë, Kërqeli kishte këmbëngulur dhe u kishte thënë krejt në fund, se nëse diçka ndodhë, unë e marrë përgjegjësinë dhe asnjë nga ju nuk do të akuzoheni.
Pas këtij qëndrimi dhe vendimi të prerë të kuzhinierit, njëri nga kamerierët e dërgon pjatën në tavolinën e “elitës komuniste” dhe sapo është vendosur pjata mbi tavolinë, thotë Kërqeli, i cili nuk dëshiron të shprehet për këtë gjest, nga modestia e tij, Mahmut Bakalli e kishte vërejtur shumë shpejt provokimin dhe kishte nxitur ta fuste pirunin për ta prishur mbishkrimin, kinse për t`iu hapur rrugën të fillonin së ngrëni.
Bakalli kishte reaguar aq shpejt, saqë kjo nuk ishte hetuar nga të tjerët.
Sot, Kërqeli kur e mendon këtë gjest, trishtohet, mirëpo siç ka thënë ai, asnjëherë nuk është penduar, pavarësisht se ka mundur të dergjet nëpër burgjet serbe për shumë vite.
“Nuk e di, në asnjë moment nuk kisha frikë dhe ishte diçka e paplanifikuar më parë, sepse për një moment më erdhi ideja, për një veprim të tillë për të shkruar me dekorim mbi sallatë parullën më të rrezikshme në atë kohë, Kosova Republikë”, ka thënë Veli Kërqeli, i cili që nga viti 91 merret me zejen e afaristit të vyeshëm dhe një nga kontribuuesit dhe dorëdhënësit e shumtë, jo vetëm për çështjen kombëtare, por edhe humane, kulturore e në veçanti sportive./RadioStar/
