Kyçja e Vitisë në autostradë në pikën më të afërt në fshatin Gërlicë, ka mbetur kauza më e rëndësishme, si e qytetarëve, ashtu edhe e bizneseve vitiase dhe më gjerë, transmeton Plus Televizion.
Pas shumë premtimeve nga qeveritë qendrore, një gjë e tillë ende nuk është realizuar. Ishte qeveria Kurti ajo që anuloi nisjen e punimeve në shtatorin e vitit 2019, në emër të ashtuquajturës ndëprerje e “gjakderdhjes financiare” .
Sot kur Buxheti për vitin 2021 është votuar në lexim të parë në Kuvend, kryetari i Komunës së Vitisë, Sokol Haliti, u ka bërë thirrje të gjithë deputetëve pa dallim partiak, që nesër të votojnë amendamentin për kyçjen e Vitisë në autostradë.
“Me këmbëngulje kërkojmë që nesër amendamenti për kyçjen e Vitisë në autostradë, në pikën natyrale në Gërlicë të votohet nga të gjithë deputetët, pasi kjo kyçje natyrale, përveç Vitisë u shërben të gjithë qytetarëve të Anamoravës madje dhe Kosovës Lindore, por poashtu kjo kyçje u krijon çasje qytetarëve të këtij rajoni në arterien kryesore ndërkombëtare Prishtinë – Shkup”, ka thënë Haliti.
Sokol Haliti – Kryetar i Komunës së Vitisë
Kuvendi i Kosovës pritet që nesër nga ora 14:00 të mbajë seancë, në të cilën do të votohet Buxheti për vitin 2021.
E ju mbetet deputetëve dhe vullnetit të tyre që nesër të votojnë pro këtij amendamenti për ta nxjerr komunën e Vitisë me rreth 60 mijë banorë nga izolimi, dhe t’u mundësohet atyre dhe bizneseve çasje në arterien ndërkombëtare Prishtinë – Shkup. /PlusTV/
