Oda e Mjekëve të Kosovës po përgatit padi ndaj Ministrisë së Shëndetësisë për mospagimin e shtesave në paga për të gjithë punëtorët shëndetësorë, ashtu siç ishte premtuar.
Nga kjo Odë kanë treguar se janë rreth 400 punëtorë shëndetësorë që kanë punuar gjatë pandemisë por që nuk kanë marrë shtesa.
Ministria e Shëndetësisë pritet të paditet nga Oda e Mjekëve të Kosovës për shkak të mospagimit të shtesave për punëtorët shëndetësorë të cilët janë angazhuar gjatë pandemisë. Kryetari i Odës së Mjekëve, Pleurat Sejdiu, ka thënë për Express se ata i kanë shkruajtur Ministrisë së Shëndetësisë në lidhje me kërkesën e tyre, dhe se janë duke përgatitur padi ndaj kësaj ministrie.
“Është një grup i mjekëve, qoftë të projektit të Caritas’it, qoftë specializantë të cilët kanë punuar gjatë kohës së pandemisë që nuk kanë marrë shtesa. Ne jemi duke e përgatitur padinë ndaj ministrisë për mospagesën e shtesave për COVID-19, pasi që me vendim të qeverisë nuk përjashtohet asnjë mjek nga këto shtesa. Një pjesë e mirë e specializantëve, rreth 400 me nënshkrime individuale, me fakte që kanë sjell, kanë autorizuar Odën që të procedohet përmes gjykatës për implementin e këtij ligji. Ne i kemi shkruajtur ministrisë disa shkresa që të respektohet vendimi i qeverisë”, ka thënë ai.
Sejdiu ka thënë se janë në pritje të një përgjigjeje nga Ministria e Shëndetësisë, dhe se nëse kërkesa e tyre nuk realizohet, ata do ta procedojnë padinë.
“Ne i kemi shkruajtur Ministrisë së Shëndetësisë dhe kemi kërkuar që në mënyrë institucionsale të rregullohet kjo. Ne jemi në pritje të nje përgjigjë. Unë kam marr informata që kabineti i ministrit ka dhënë urdhër që të shqyrtohet kjo. Nëse ministria zbaton këtë vendim, ne do të ndërprejmë padinë, nëse kërkesa jonë nuk procedohet, ne do ta procedojmë padinë në gjykata brenda dy jave”, ka thënë ai.
Tutje Sejdiu ka treguar se ata kërkojnë që punëtorët shëndetësorë të marrin edhe shtesat që nuk ju janë dhënë që nga dita kur është marrë vendimi i Qeverisë për to.
Kujtojmë që më 10 gusht të vitit të kaluar, ish-ministri i Shëndetësisë, Armend Zemaj kishte bërë të ditur se deri në përfundim të pandemisë, punonjësve shëndetësorë do të ju paguhen shtesa deri në 300 euro në muaj, bazuar në kategorizimin e bërë sipas rrezikshmërisë së drejtpërdrejtë nga virusi Covid-19.
