Kryediplomatja kosovare, Donika Gërvalla-Schwarz, ka thënë se fjalët në artikullin e mediumit zviceran, ku thuhet se ajo “kërkon që shumë vrasje të pasluftës në vend të zgjidhen. Pas tërheqjes së trupave serbe, ato u kryen kryesisht nga anëtarët e Ushtrisë Çlirimtare Kosovës, UÇK” , janë fjalët e gazetarit të NZZ, Andreas Reich dhe se nuk është deklaratë e saja.
Ndonëse pjesa e shkoqitur është ende në përmbajtjen e intervistës në mediumin zviceran, Gërvalla-Schwarz, nëpërmjet një postimi në llogarinë e saj në ‘Facebook’, ka thënë se pjesa e njëjtë e publikuar në mediet kosovare është si “fushatë kundër saj”.
“Veçse një përsëritje e lodhtë e fushatës së përsëritur kundër nesh. Këmbëngulja e disave për të sulmuar dinjitetin dhe përkushtimin tonë për vendin nuk mund të funksionojë duke keqpërdorur UÇK-në. Në Kosovë gjithkush e din se kush e ka mbrojtur në të kaluarën dhe e mbron edhe sot UÇK-në, luftën çlirimtare dhe sakrificën e shqiptarëve jo vetëm gjatë dekadave të fundit”, ka deklaruar në reagimin e saj ndër të tjera ajo.
Në intervistën e dhënë për mediumin zviceran, fjalët e Gërvalla-Schwarz ishin se kjo e fundit ka kërkuar që Kosova të merret me krimet e pasluftës, në mënyrë që “të shërohet shoqëria”.
“Kosova duhet të merret me krimet e pasluftes për ta shëruar shoqërinë”, deklaroi në intervistë ajo.
Reagimi i plotë i Donika Gërvalla-Schwarz:
Sqarim:
Citati i mëposhtëm për UÇK-në, i marrë nga gazeta zvicerane NZZ ka vetëm një autor dhe ai quhet Andreas Reich, gazetar i kësaj gazete. Pra citați shpreh opinionin e gazetarit dhe jo timin. Një keqinformim i tillë mund të ishte evituar po të ishte lexuar dhe kuptuar mirë teksti dhe gjermanishtja, para se të citohet dhe botohet në forma të tilla.
Veçse një përsëritje e lodhtë e fushatës së përsëritur kundër nesh. Këmbëngulja e disave për të sulmuar dinjitetin dhe përkushtimin tonë për vendin nuk mund të funksionojë duke keqpërdorur UÇK-në. Në Kosovë gjithkush e din se kush e ka mbrojtur në të kaluarën dhe e mbron edhe sot UÇK-në, luftën çlirimtare dhe sakrificën e shqiptarëve jo vetëm gjatë dekadave të fundit.
Nuk e pres, por do të ishte korrekt një korrigjim i lajmit dhe një kërkimfalje nga ato media që e kanë botuar.
Natën e mirë!
