Të nderuar bashkëqytetarë,
Familje të dëshmorëve,
Invalidë dhe veteranë të UÇK-së,
Kaluan plot 22 vite nga shpallja e qytetit të lirë të Gjilanit.
Përpjekjet tona shekullore ndër breza, me organizime të ndryshme patën të vetmin qëllim – lirinë e popullit tonë. Rrugën e lirisë e filluan njerëz idealistë të shumë brezave duke i masovizuar rreshtat deri në luftën titanike të Ushtrisë Çlirimtare të Kosovës.
Kjo luftë e drejtë, përveç përmasave kombëtare arriti të depërtojë në nivelet më të larta ndërkombëtare dhe të përkrahet nga popuj e shtete që bazë të zhvillimit të tyre kanë lirinë dhe demokracinë.
Ne kishim fatin që në Zonën tonë Operative të Karadakut të kemi bashkëpunim të shkëlqyeshëm me Ushtrinë Amerikane si përkrahësen me të madhe të luftës për liri.
Të gjithë e dijmë çmimin e lirisë, andaj të festojmë sot bashkërisht, duke i kujtuar dhe nderuar, sot e përherë, emrat më të shtrenjtë që u flijuan për pavarësinë e vendit tonë.
Nderi dhe lavdia ju takon atyre që u bënë themeli i lirisë, ndërsa e ardhmja, brezave që do ta ndërtojnë e zhvillojnë vendin tonë.
Urime dita e çlirimit Gjilan!
