– Prokuroria Themelore në Gjilan, Departamenti për Krime të Rënda, ka kërkuar nga Gjykata kompetente në Gjilan, caktimin e masës së paraburgimit kundër të pandehurve F.O., G.B. dhe I.V, për shkak të dyshimit se me armë zjarri kanë privuar nga jeta tani të ndjerin B.V.Një gjë e tillë është bërë e ditur nga raporti 24 orësh i Policisë së Kosovës (PK), raporton “Betimi për Drejtësi”.Sipas kërkesës, ekziston dyshimi i bazuar se të pandehurit e sipërshënuar, më 12 shtator 2021, rreth orës 19:45 minuta, pas një përgatitje paraprake, në bashkëkryerje kanë privuar nga jeta të ndjerin B.V., duke e vënë në rrezik edhe jetën e personave tjerë, të cilët kanë qenë afër tij.Thuhet që të dyshuarit kanë ardhë së bashku me një veturë të markës ‘’Audi A3’’ dhe janë ndalë tek një market, ku nga aty të armatosur kanë dalë dy nga të pandehurit dhe me të arritur në vendin e ngjarjes, i afrohen të ndjerit, i cili ishte ulur në një kafene në Gjilan.Të njëjtit pastaj thuhet se kanë shtënë me armë zjarri në drejtim të tashmë të ndjerit B.V, ku për shkak të plagëve të marra i njëjti ka ndërruar jetë në vendin e ngjarjes, ndërsa të pandehurit pas kryerjes së vrasjes janë larguar me shpejtësi nga vendi i ngjarjes.Me këto veprime, të njëjtit në bashkëkryerje dyshohen se kanë kryer veprën penale “Vrasja e rëndë”, nga neni 173 të Kodit Penal, vepër e cila dënohet me denim jo më pak se dhjetë vjet burgim ose me burgim të përjetshëm.Gjithashtu, të njëjtit dyshohen edhe për veprën penale “Mbajtja në pronësi, kontroll ose posedim të paautorizuar të armëve”, pasi që në mënyrë të paautorizuar kanë mbajtur në pronësi armë zjarri. Vepra në fjalë, nga neni 366, paragrafi i Kodit Penal është e dënueshme me gjobë deri në shtatëmijë e pesëqind euro ose me burgim deri në pesë vjet.
Radio Star: Personat e përmendur në këtë artikull konsiderohet të pafajshëm, përveç nëse nga gjykata vërtetohet se janë fajtorë me vendim të formës së prerë.
