Një aksident i rëndë trafiku ka ndodhur të enjten në Gjilan, ku si pasojë ka humbur jetën një grua.
Sipas njoftimit të Policisë, aksidenti ndodhi rreth orës 16:05, mes dy veturave me targa vendore. Të dy drejtuesit e veturave dhe dy pasagjerë u lënduan dhe u dërguan për trajtim në Qendrën Emergjente në Gjilan.
Për shkak të lëndimeve të rënda, një nga drejtuesit dhe një pasagjere u transferuan në QKUK. Fatkeqësisht, pasagjerja ka ndërruar jetë në spital si pasojë e plagëve të marra.
Me vendim të prokurorit, trupi i pajetë është dërguar në IML për obduksion, ndërsa hetimet për rastin po vazhdojnë.
“Është raportuar se ka ndodhur aksident në komunikacion rrugor në mes të dy veturave udhëtarësh me targa vendore dhe drejtues meshkuj kosovarë. Si pasojë e aksidentit lëndime trupore kanë pësuar dy drejtuesit e veturave dhe dy pasagjerë të cilët kanë marrë ndihmë mjekësore në QE Gjilan. Për shkak të lëndimeve të rënda drejtuesi i njërës veturë dhe pasagjerja femër kosovare janë dërguar në QKUK, ku si pasojë e plagëve të marra pasagjerja ka ndërruar jetë”, thuhet në raportin e policisë.
