Kryetari i Komunës së Gjilanit, Alban Hyseni, ka pritur sot në vizitë homologun e tij nga Tetova, z. Bilall Kasami. Takimi u hap me homazhe në Kodrën e Dëshmorëve, ku dy kryetarët nderuan sakrificën e atyre që lanë amanetin e lirisë dhe të qëndresës, duke theksuar rëndësinë e kujtesës historike dhe respektit institucional.
Në kuadër të atmosferës sportive që ka përfshirë rajonin në prag të ndeshjes së kualifikimeve në Ligën e Konferencës mes FC Drita dhe KF Shkëndija, Hyseni dhe Kasami shkëmbyen fanellat zyrtare të klubeve që përfaqësojnë qytetet e tyre. Gjatë këtij momenti simbolik, të dy kryetarët uruan që ekipet të tregojnë lojë të ndershme, konkurruese dhe me vlera të larta sportive.
Në prononcimin e tyre, Hyseni dhe Kasami theksuan mesazhin se sporti, e veçanërisht futbolli, mbetet një forcë që bashkon komunitete dhe krijon ura bashkëpunimi mes qyteteve shqiptare në gjithë rajonin.
Takimi u vlerësua si një hap i rëndësishëm drejt thellimit të bashkëpunimit institucional dhe kulturor ndërmjet Gjilanit dhe Tetovës.
