Fshati Zhegër po përjeton një ringjallje të identitetit të tij kulturor përmes rikonstruktimit të plotë të Shtëpisë së Kulturës – një hapësirë me rëndësi të veçantë historike dhe shoqërore për komunitetin lokal.
Kryetari i Komunës së Gjilanit, Alban Hyseni, gjatë vizitës së sotme në këtë projekt theksoi rëndësinë që kjo qendër ka për Zhegrën. “Shtëpia e Kulturës në Zhegër nuk është thjesht një objekt. Ajo është kujtesë kolektive, vend i ngjarjeve të rëndësishme kulturore dhe simbol i organizimit shoqëror. Tashmë, me hapësirat e reja dhe funksionale, ajo do t’i kthehet komunitetit më e fuqishme se kurrë,” u shpreh Hyseni.
Projekti përfshin jo vetëm renovimin estetik të godinës, por edhe përshtatjen e saj me nevojat bashkëkohore kulturore dhe edukative. Brenda objektit do të funksionojë një bibliotekë moderne, si dhe hapësira për aktivitete artistike, ekspozita, ligjërata dhe organizime të tjera komunitare.
Kjo ndërhyrje është pjesë e angazhimit të Komunës së Gjilanit për të decentralizuar investimet dhe për të fuqizuar zonat rurale përmes infrastrukturës kulturore dhe arsimore.
Për banorët e Zhegrës, kjo është më shumë se një ndërhyrje ndërtimore – është një hap drejt ruajtjes së identitetit, trashëgimisë dhe rigjallërimit të jetës kulturore lokale.
