Kryeministri Albin Kurti ka thënë edhe një herë se nuk përjashtohet mundësia që në Kosovë të ketë luftë.
Ai, një intervistë për gazetën kroate “Vecernji list”, ka përmendur stërvitjet e përbashkëta ushtarake të Serbisë dhe Rusisë, derisa thotë se do të ishte e papërgjegjshme të thuhet se s’do të ketë kurrë më konflikt.
“Nëse nuk ka përgatitje për luftë, atëherë pse vitin e kaluar Serbia dhe Rusia kanë pasur 104 stërvitje dhe aktivitete të përbashkëta ushtarake nga 91 që kishin planifikuar dhe në të njëjtën kohë dy stërvitjet më të rëndësishme ushtarake që i kanë pasur janë quajtur ‘Mburoja Sllave’ dhe ‘Vëllazëria Sllave’”, citohet të ketë thënë Kurti, njofton Klankosova.tv.
Shefi i qeverisë tha se përderisa serbët ëndërrojnë për Kosovën si pjesë e Serbisë, ato ëndrra do të kthehen në makth për të gjithë Ballkanin, duke theksuar se në Ballkan nuk mund të ketë luftë pa Serbinë, as paqe pa shqiptarë.
Gjëja më e rrezikshme, sipas Kurtit, është se lidershipi i Serbisë e konsideron Rusinë ‘nënën’ tyre dhe kjo krijon rrethana në Ballkan me shumë rrezik dhe ankth.
Një deklaratë të tillë kryeministri kosovar e kishte dhënë edhe për të përditshmen italiane “La Repubblica”.
“Episodi i parë, rrjedhojë e idesë fashiste të pansllavizmit që ka Kremlini ishte Ukraina. Nëse do të ketë një episod të dytë, për shembull në Transnistria, atëherë gjasat që një luftë e tretë të ngjajë në Ballkanin perëndimor, e në Kosovë veçanërisht, janë shumë të larta”, kishte deklaruar Kurti në intervistën e dhënë në muajin gusht.
