Ministri i Mjedisit, Planifikimit Hapësinor dhe Infrastrukturës Liburn Aliu është deklaruar pasi Prokuroria Speciale ka nisur hetimet ndaj tij në çështjen e ambalazhuesve të ujit.
Aliu thotë se njoftim zyrtar nuk ka marrë, megjithatë thekson se për të autoriteti më i lartë është ligji.
Ai njofton se është i gatshëm të bashkëpunojë vetëm për drejtësi, sipas ligjit, deri në zbardhjen e plotë të çdo rasti.
“Po qarkullon në disa media një lajm se kanë nisur hetime ndaj meje. Unë njoftim zyrtar nuk kam patur, por dëshiroj të njoftoj opinionin publik dhe vetë prokurorinë se për mua autoriteti më i lartë është ligji, se punoj dhe angazhohem çdo ditë për respektimin e ligjeve dhe zbatimin e tyre, dhe se për çdo çështje, çdo hetim apo çdo dyshim, jam i gatshëm të bashkëpunoj vetëm për drejtësi, sipas ligjit, deri në zbardhjen e plotë të çdo rasti”, shkruan Aliu.
Prokuroria Speciale ka marrë aktvendim për zgjerimin e hetimeve në çështjen e ambalazhuesve të ujit. Në një aktvendim që e ka siguruar Nacionalja, i pandehur rezulton të jetë Ministri i Mjedisit, Planifikimit Hapësinor dhe Infrastrukturës, Liburn Aliu.
Sipas dokumentit të siguruar, ministri Liburn Aliu dyshohet se gjatë periudhës kohore prej vitit 2021-2024 në cilësinë e përsonit zyrtar, pra si ministër, me qëllim të përfitimit të kundërligjshëm të dobisë pasurore për vete apo të tjerët dhe për t’i shkaktuar dëm Buxhetit të Republikës së Kosovës, ka keqpërdorur pozitën zyrtare.
Ai dyshohet se duke qenë në dijeni se zyrtarët e kësaj Ministrie të pandehurit Izedin Bytyqi e Naser Hafizi vepruan në kundërshtim të plotë me rregullat, procedurat e ligjet në lidhje me llogaritjen e borxheve.
Ministri Liburn Aliu dyshohet se ka lejuar, me qëllim përfitimi e për t’i shkaktuar dëm buxhetit të shtetit, që operatorëve ekonomik të u zvogëlohen borxhet.
Më këtë sipas aktvendimit për zgjerimin e hetimeve, Ministri Aliu i ka shkaktuar dëm buxhetit të Kosovës miliona euro.
