Zgjedhjet e fundit në Kosovë kanë sjellë një surprizë të madhe në skenën politike të Gjilanit, ku kandidati për deputet nga radhët e Lëvizjes Vetëvendosje, Burim Demiri, ka shënuar një rezultat të jashtëzakonshëm shkruan Radio Star.
Me 11,672 vota të grumbulluara deri më tani, ai është në rrugë të sigurt për të siguruar një ulëse në Kuvendin e Republikës së Kosovës.
Demiri, i cili iu bashkua politikës pikërisht në këto zgjedhje, ka tejkaluar pritshmëritë dhe është shndërruar në një nga emrat më të votuar të Vetëvendosjes. Aktualisht, ai renditet ndër kandidatët kryesorë të partisë, duke lënë pas shumë deputetë aktualë të të gjitha subjekteve politike.
Ky rezultat jo vetëm që e bën atë një nga kandidatët më të suksesshëm të zgjedhjeve, por gjithashtu thekson mbështetjen e madhe që ai ka marrë nga qytetarët e Gjilanit. Me mbi 80% të votave të numëruara, Demiri duket se do të jetë pjesë e legjislaturës së re, duke shënuar kështu një fitore të rëndësishme për të dhe për Vetëvendosjen në këtë komunë./radiostargjilan/
