Presidenti i Serbisë, Aleksandar Vuçiq, ishte i pari që shpalli marrëveshjen e tij me konceptin e ri euro-amerikan të negociatave, kuadri i të cilit përcaktohet nga kërkesa drejtuar Beogradit për të mos penguar hyrjen e Kosovës në të gjitha organizatat ndërkombëtare, si dhe kërkesa për Prishtinën që më në fund do të formojë Asociacionin e komunave me shumicë serbe, tha për ‘Danas’ analisti Boshko Jakshiq, njohës i politikës së jashtme.
Duke komentuar njoftimet nga Brukseli se qëllimi është që më së voni brenda një muaji të sillen në tavolinën e negociatave kryeministri i Kosovës, Albin Kurti dhe presidenti serb, Aleksandar Vuçiq dhe të nënshkruhet marrëveshja bazuar në planin evropian të paqes, Sonja Biserko, kryetare e Komitetit të Helsinkit për të Drejtat e Njeriut thotë se “që nga fillimi i ofensivës diplomatike perëndimore, veçanërisht që kur Quint-i ia paraqiti propozimin Beogradit dhe Prishtinës, ishte e qartë se Perëndimi dëshironte t’i jepte fund çështjes së Kosovës sa më parë”, transmeton Demokracia.com.
Kujtojmë se Kurti ia ka konfirmuar në një bisedë telefonike këshilltarit të Departamentit Amerikan të Shtetit, Derek Chollet se ka gatishmërinë për takimet e radhës të nivelit të lartë politik në kuadër të dialogut Beograd-Prishtinë.
Sipas Sonja Biserkos, lufta e Ukrainës vuri në fokus çështjen e sigurisë, domethënë kristalizoi prioritetet deri në fund.
“Në këtë kuptim, Ballkani, mbi të gjitha Serbia, është çështje sigurie. Serbia me të drejtë perceptohet si faktor kyç i destabilitetit në rajon”, mendon Biserko.
Siç shton ai, prandaj është reale që Vuçiq dhe Kurti të ftohen në Bruksel për ta nënshkruar propozimin në fund të muajit mars.
“Interesante është intervista e fundit e presidentit Vuçiq, në të cilën ai deklaroi se Serbia duhet të udhëhiqet nga “interesat e saj ekonomike, të cilat janë në perëndim, si dhe çështjet kulturore, të cilat janë edhe në lindje”. Një formulim interesant për të marrë një vendim. Duke gjykuar nga disa tregues të një ndryshimi të narrativës, mbi të gjitha, në median që ai kontrollon, duket se në fund të fundit ai ka vendosur për ekonominë”, shton Biserko.
Është e vërtetë, thekson ajo më tej, se ambasadori rus beson se çështja e Kosovës duhet të shtyhet deri në përfundimin e luftës në Ukrainë.
“Ai padyshim ka një lloj tregtie në mendje. Megjithatë, pas gjithë mizorive që Rusia po kryen në Ukrainë, nuk ka gjasa që kjo të jetë e mundur. Sepse Perëndimi është në proces të ndërtimit të një rendi të ri të sigurisë evropiane, në të cilin Ballkani është një pikë e rëndësishme gjeostrategjike”, përfundon Sonja Biserko. /Demokracia.com/
