Një rast i dhunës në familje ka ndodhur në Gjilan.
Ndihmën e Policisë e ka kërkuar një grua nga një fshat i Gjilanit, pasi ka denoncuar bashkëshortin e saj për dhunë.
“Gjilan 08.07.2023 – 18:00. Është arrestuar i dyshuari mashkull kosovar nën dyshimin se pas një mosmarrëveshje ka sulmuar fizikisht viktimën femër kosovare me ç’rast i ka shkaktuar lëndime trupore. Viktima nuk ka pranuar tretman mjekësor dhe sipas saj i dyshuari vazhdimisht i shkakton dhunë fizike dhe psikike. Me vendim të prokurorit i dyshuari pas intervistimit është dërguar në mbajtje”, thuhet në raportin e policisë.
Ndërkohë, Sinjali mëson se sipas dëshmisë së saj, pas një konflikti verbal lidhur me përgatitjen e çajit, 46-vjeçari fillimisht e ka fyer me fjalë të rënda e më pas e ka tërhequr zvarrë nëpër tokë. E njëjta ka pohuar se përjeton vazhdimisht dhunë psikike e fizike nga bashkëshorti i saj. Viktima ka pësuar lëndime trupore, mirëpo nuk ka pranuar që të marrë tretman mjekësor.
I dyshuari është arrestuar dhe është shoqëruar në stacion policor, ku është intervistuar lidhur me rastin.
Me urdhër të prokurorit, ai është dërguar në mbajtje dhe do të hetohet nën dyshimet për kryerjen e veprës penale ‘Dhunë në familje’.
