Përderisa stadiumi i Gjilanit vazhdon të mbetet në pritje të investimeve, duke u përballur sot edhe me pezullimin e radhës të tenderit për renovimin e tij, kryeministri Albin Kurti dhe ministri i Kulturës, Rinisë dhe Sportit, Hajrulla Çeku, ishin sot në Gjakovë për të parë nga afër ecurinë e punimeve në stadiumin e këtij qyteti.
Vizita e tyre u shoqërua me publikimin e fotografive dhe një mesazh optimist nga ministri Çeku, i cili përmes një statusi në Facebook lavdëroi progresin e shpejtë të punimeve në Gjakovë.
“Bashkë me kryeministrin Kurti, ishim për të parë nga afër ecurinë e punimeve në stadiumin e Gjakovës. Në këtë projekt po punohet me dinamikë të lartë dhe profesionalizëm. Investimet në infrastrukturë sportive nuk do të ndalen, si për nevoja të brendshme, po ashtu edhe në përgatitje për Lojërat Mesdhetare Prishtina 2030,” shkroi ai.
Ky përkushtim për investime në sport bie ndesh me realitetin në Gjilan, ku stadiumi vazhdon të mbetet në harresë. Pezullimi i sotëm i renovimit të tij vetëm sa e forcon bindjen se ky projekt nuk është prioritet për institucionet qendrore.
Ky trajtim i pabarabartë ka nxitur reagime të shumta nga komuniteti sportiv dhe banorët e Gjilanit, të cilët pyesin se për sa kohë do të mbetet qyteti i tyre jashtë planeve të investimeve madhore në infrastrukturën sportive.
