Kryetarja e Komisionit Qendror të Zgjedhjeve, Valdete Daka, ka mbajtur një konferencë për media me ç’rast ka deklaruar se ka pranuar kërcënime nga partitë politike.
Ajo tha se institucioni që ajo drejton është duke punuar maksimalisht që t’i kryejë detyrat e veta.
“Nuk do të kisha dashur asnjëherë që ta mbaja këtë konferencë, mirëpo unë jam këtu sepse ndihem e obliguar që qytetarët e Kosovës t’i siguroj se KQZ-ja është duke punuar maksimalisht që t’i kryejë detyrat e veta dhe akuzat e partive politike në KQZ janë ndërhyrje e drejtpërdrejt ndaj pavarësisë së institucionit. Kërcënimet ndaj meje dhe familjes time janë të paprecedenta”, deklaroi Daka.
“Të gjithë kandidatëve do t’u them vetëm dy fjalë: është ligji dhe aktgjykimi që ua pamundëson kandidimin, dhe jo unë. Unë nuk e kam shkruar as nenin 29 të këtij ligji që pamundëson kandidimin e një personi që është shpallur fajtor. Çdo person që mendon se po i bëhet e padrejtë, do të mund të ankohet në institucionet përgjegjëse”, u shpreh Daka.
Ajo tha se ligjet nuk i ka shkruar as votuar, por se si drejtuese e KQZ-së do t’i zbatojë drejtpërdrejtë ligjet e këtij institucioni.
“Ligji është në fuqi nga viti 2008, dhe derisa partitë politike nuk e ndryshojnë ligjin, ne do të vazhdojmë ta respektojmë atë. Jam betuar si gjyqtare për t’i zbatuar ligjet në fuqi dhe këtë vendim do ta çoj deri në fund”.
Kryetarja e KQZ-së ftoi të gjithë pjesëmarrësit në zgjedhje të përmbahen nga kërcënimet e akuzat.
“I ftoj të gjithë të përmbahen nga kërcënimet dhe akuzat dhe t’i respektojnë ligjet, dhe të na lejojnë që t’i respektojmë ligjet ashtu siç parashihen me Kushtetutë”, theksoi në fund, Valdete Daka, kryetare e Komisionit Qendror të Zgjedhjeve.
