Sot në Superligën e Kosovës në futboll zhvillohen ndeshjet e xhiros së 16-të, ku njëra prej sfidave më interesante pritet të luhet në Klinë. Drita do të jetë mysafire e Dukagjinit, skuadër që kohëve të fundit ka shfaqur një formë dukshëm më të mirë nën drejtimin e trajnerit të ri, duke u bërë kundërshtar shumë më i rrezikshëm sesa në fillim të edicionit.
Skuadra gjilanase hyn në këtë përballje me synimin për t’u rikthyer te rezultatet pozitive pas humbjes në derbin si vendas ndaj Ballkanit. Humbja e fundit ka shtuar presionin te “bardhekaltërit”, të cilët kërkojnë stabilitet dhe vazhdimësi në luftën për të qëndruar në garë për kreun e tabelës.
Aktualisht, Drita ka grumbulluar 23 pikë dhe pozicionohet në vendin e katërt, duke mbajtur ende gjallë ambiciet për t’u ngjitur më lart. Megjithatë, sfida e sotme nuk do të jetë aspak e lehtë, pasi Dukagjini në shtëpi di të jetë i fortë dhe ka dëshmuar se mund t’i komplikojë punët edhe skuadrave pretendente.
Ndeshja do të zhvillohet nga ora 13:00 në stadiumin “18 Qershori” në Klinë.
