FC Drita ka bërë të ditur se ka nisur shitja e biletave për ndeshjen e kthimit ndaj Florianës së Maltës, e vlefshme për kualifikimet evropiane. Biletat janë në dispozicion para Teatrit të Qytetit, ndërsa interesimi i tifozëve pritet të jetë i madh.
Pas barazimit 1:1 në ndeshjen e parë të zhvilluar në Maltë, gjithçka mbetet e hapur për takimin vendimtar që do të luhet të martën në stadiumin “Fadil Vokrri”.
Klubi u ka bërë thirrje të gjithë tifozëve “Intelektualë” dhe sportdashësve që të jenë pranë skuadrës në këtë përballje shumë të rëndësishme, duke krijuar një atmosferë të zjarrtë dhe duke i dhënë ekipit mbështetjen e nevojshme në rrugëtimin drejt kualifikimit në raundin e ardhshëm.
Sfida ndaj Florianës konsiderohet një nga ndeshjet më të rëndësishme të sezonit për kampionin e Kosovës, i cili synon ta shfrytëzojë maksimalisht faktorin fushë dhe mbështetjen e tifozëve për të siguruar avancimin në garat evropiane.
Të martën, sytë e futbollit kosovar do të jenë të drejtuar nga stadiumi “Fadil Vokrri”, ku FC Drita do të kërkojë një fitore me vlerë kualifikimi.
