Luftërat politike në Kosovë kanë qenë gjithnjë të ashpra. Por, ministrja aktuale e Jashtme e Kosovës, Donika Gërvalla Schwarz i ka çuar në një shkallë më lart se të tjerët, përmes deklaratave të rënda e të pambështetura që ndihmonin propagandën e armikut të Pavarësisë së Kosovës, Serbisë.
Deklarata e bërë kundër Thaçit e Veselit më 2017 tashmë ka bërë bujë të madhe. Në atë deklaratë ajo thoshte se do të depononte dëshmi në Gjykatën Speciale kundër të dyve. Në atë kohë, znj. Gërvalla po përpiqej të rrënonte autoritetin e Isa Mustafës në krye të LDK-së, që kishte bërë koalicion me PDK-në në fund të 2015-s.
Por, ajo ka qenë tepër e ashpër edhe me Rexhep Selimin – kryetarin e Grupit Parlamentar të Vetëvendosjes, funksion që aktualisht e ushtron si ushtruese e detyrës, znj. Mimoza Kusari Lila, përcjell Periskopi.
Ajo e quante z. Selimi si “figurë të diskredituar të botës së krimit” qysh më 25 mars të vitit të kaluar, kur po rrëzohej Qeveria Kurti I, dhe të cilin rrëzim po e prostonte ashpër vetë Rexhep Selimi.
Selimi është i akuzuar për krime lufte dhe krime kundër njerëzimit bashkë me Hashim Thaçin, Jakup Krasniqin e Kadri Veselin dhe që nga nëntori po mbahet në paraburgim.
Ja çka shkruante Gërvalla Schwarz në atë kohë:
“Nëse mund t’ju besohet informacioneve të mediumeve të ndryshme, Rexhep Selimi qenka propozuar si kryetar i Grupit Parlamentar të VV-së. Ky do të ishte një sinjal shumë i shëmtuar, jo vetëm për faktin që Rexhep Selimi është një prej të dyshuarve të Hagës.” – shkruante ajo më 7 shkurt, katër ditë pas formimit të Qeverisë Kurti I.
“Sa gërditshëm me e pa pikërisht Rexhep Selimin duke folur për shtetin e së drejtës. Fakti më i shëmtuar që as LVV nuk ka arritur të çlirohet tërësisht nga figurat e saj të diskredituara të botës së krimit.” – shkruante ajo më 25 mars.
