Thesari i Shtetit ka sqaruar arsyen pse u është dërguar kërkesa për kthim të mjeteve pronarëve të kompanisë ku dyshohet se u transferuan dy milionë eurot e shtetit.
Zëvendësdrejtoresha e Thesarit, Medije Musliu, ka thënë se shkresa protokollare që është dërguar si kërkesë për kthim të mjeteve, është procedurë standarde e paraparë në nenin 12, paragrafit 12 të ligjit e buxhetit, i cili thotë se ne rast se një individ, zyrtar, person apo një entitet pranon ndonjë pagesë nga Fondi i Kosovës si rrjedhim i gabimit, ngatërrimit apo lëshimit, ato fonde i kthehen Fondit të Kosovës në afat prej pesë (5) ditësh nga pranimi i njoftimit me shkrim.
“Pavarësisht nga shkaku dhe rrethanat e ndodhjes, ky është një transaksion i paautorizuar, përkatësisht dalje e paaprovuar e parasë publike dhe pa asnjë paragjykim mbi procesin, çdoherë kërkohet kthimi i tyre. Në shkresë është bërë me dije se proceset hetimore janë nisur dhe rasti është njoftuar organeve, por kjo shkresë duhej të ishte dërguar në aspektin procedural dhe ligjor”, ka deklaruar Musliu.
Ajo ka bërë me dije se letra është dërguar direkt në adresën e deklaruar në ARBK nga operatori ekonomik i dyshuar për këtë rast.
“Letra është dërguar direkt në adresën e deklaruar në ARBK nga operatori ekonomik i dyshuar për krejt këtë, ndaj edhe në atë adresë është dërguar. Në nuk kemi dijeni se si ka mundur që kjo të transmetohet edhe në kanale tjera. Duke shprehur bindjen se të gjitha faktet do të zbardhen dhe kryesit do të marrin dënimin e merituar, e pame të rrugës të sqarojmë qëllimin dhe arsyen e dërgimit të kësaj shkrese”, ka deklaruar Musliu.
Ndryshe, dy pronarët e kompanisë “LDA Group” Sh.P.K., me bazë në Llapushnik të Drenasit, ndodhen në arrati që nga e marta.
Atë ditë, Policia e Kosovës arrestoi Labinot Grudën, zyrtarin e Thesarit të Shtetit, i cili dyshohet për transferet ilegale në vlerë prej mbi dy milionë eurove në llogarinë e “LDA Group”.
Përmes një kërkese me e-mail drejtuar dy të dyshuarve, të cilët besohet se janë arratisur jashtë vendit, Qeveria e Kosovës i është lutur atyre që në një afat brenda 5 ditëve t’ua kthejnë dy milionë e 77 mijë eurot.
“Kërkojmë që në afat prej pesë ditë të ktheni shumën prej 2,077,995.90 Euro në llogarinë e Buxhetit të Republikës së Kosovës në Bankën Qendrore të Kosovës, si pagesë e paautorizuar”, thuhet në kërkesën që është publikuar në media.
“Ju si operator ekonomik keni pranuar pagesën në llogarinë tuaj dhe nuk keni njoftuar dhe as kthyer mjetet që i keni pranuar nga buxheti i Kosovës”, thuhet në kërkesën e Departamentit të Thesarit për dy pronarët e “LDA Group”.
Kërkesa e Qeverisë për bashkëpunim me pronarët e kompanisë me bazë në Drenas, bazohet në Ligjin për Ndarjet Buxhetore për vitin 2020 për buxhetin e Republikës së Kosovës.
Sipas këtij ligji, në rast se një individ apo entitet pranon ndonjë pagesë nga Fondi i Kosovës si rrjedhim i gabimit, ato fonde i kthehen Fondit të Kosovës në afat prej 5 ditësh nga pranimi i njoftimit me shkrim nga drejtori i Përgjithshëm i Thesarit, me të cilin njoftohet pala pranuese që ajo pagesë është bërë gabimisht.
Bazuar në dosjet e Prokurorisë së Shtetit, ekzekutimi i pagesave ilegale nga Thesari i Shtetit në llogarinë e “LDA Group” Sh.P.K përfundoi brenda tetë minutave.
Përmes procesimit të katër transaksioneve, në orën 12:41 të së premtes së 9 tetorit, dy milionë euro u derdhën në xhirollogarinë e kompanisë me bazë në fshatin Llapushnik të Drenasit.
Policia e Kosovës njoftoi të mërkurën përmes raportit 24-orësh se është kërkuar bllokimi i llogarive ku dyshohet të jenë transferuar mjetet nga Thesari.
“Me 20.10.2020 23:35 pas hetimeve të zhvilluara është arritur të arrestohet një i dyshuar m/k dhe dy të tjerë gjenden në arrati. Të dyshuarit dyshohet se duke keqpërdorur detyrën zyrtare duke përdorur thesarin shtetëror të Republikës së Kosovës kanë transferuar para në vlerë 2.077.995.90 milion euro”, thuhej në raportin e Policisë.
Për transferimin ilegal të mjeteve shpalosi detaje edhe ministrja e Financave, Hykmete Bajrami.
Në një konferencë të jashtëzakonshme për media dy ditë më parë, ministrja Bajrami ka thënë se kanë ndodhur katër transaksione të dyshimta me vlerë të përgjithshme prej mbi 2 milionë eurove.
