Pas kremtimit të festës tradicionale të Bajramit të Vogël në familje, shumë qytetarë nga Kosova vendosën që të udhëtojnë drejt Shqipërisë për të pushuar. Pavarësisht numrit të madh të udhëtarëve, nuk pati ndalesa as në Vërmicë, e as në pikën e pagesës te trau.
Menaxhimi i integruar i kufirit dhe heqja e kontrollit për dokumente në pikën kufitare të Vërmicës ka bërë që sot, të gjithë ata që vendosën të ikin me pushime në Shqipëri, dhe jo vetëm, të mos presin për të kaluar në territorin shqiptar. Udhëtarët thonë se pas festës tradicionale, po shkojnë për disa relaks.
“E kemi kryer drekën, urimet në mëngjes, tash po shkojmë pak për relaks se vërtet angazhimi i madh me punë, kështu që besoj mirë kemi për të kaluar”, tha Barije Besimi, udhëtare.
“Pas drekës, pasi u tubuam me djem e vajza, me reja dhe nipa, u nisëm pak me plakë e çikën”, tha Nazmi Xami, udhëtar tjetër.
Disa të tjerë udhëtuan me familjarë për në vendet e Perëndimit, ku punojnë e jetojnë.
“Atje do të kemi festë, që jetojmë atje. Këta janë me mua, janë fëmijët, që e marrin maturën dhe është zakon atje të bëhet festë”, tha Ramadan Reshitaj, udhëtar.
Kishte edhe nga ata qytetarë që po udhëtojnë për të parë ndeshjen që do të luhet nesër mes Shqipërisë dhe Serbisë.
“Do ta shikojmë në Tiranë, por jo në stadium sepse nuk kemi rezervuar bileta, s’ka pasur bileta. Do ta shohim në Tiranë dhe mos kthehemi, pastaj në Durrës disa ditë, kështu shpresojmë të fitojmë”, shtoi një tjetër udhëtar.
Pavarësisht fluksit të madh të udhëtarëve që në orët e mëngjesit, nuk pati asnjë ndalesë as në Vërmicë, por as te trau i pagesës së Rrugës së Kombit.
Shifrat e kalimit kufitar nuk dihen deri në orën 24, por sipas informacioneve jozyrtare, është regjistruar fluksi më i lartë që nga fillimi i vitit 2025.
