Fshatin Koretin e ndajnë pak minuta nga qendra e Kamenicës. Për këtë fshat janë dy mendime, se është një vend me ambient të pastër, por për disa edhe të ndotur.
Një pjesë e fshatit shfaq një organizim dhe mobilizim të mirë të banorëve, por në anën tjetër ku rrjedh lumi ndryshon mendimi për këtë vend, pasi këtu rrjedhin më shumë ujërat e zeza sesa rrjedha natyrale e ujit, raporton emisioni “Sot” në KTV.
Se më të vërtetë koretinasit e duan këtë vend kjo dëshmohet edhe nga vet organizimi i tyre, i filluar nga viti 2014. Dëshira e madhe e mërgimtarëve për ta parë Koretinin të pastër ka bërë që ata të krijojnë shoqatën humanitare “Koretini”, e cila ka aktivizuar fshatin për një ambient të bukur.
Koretini ka 4150 banorë, 2700 janë rezidentë dhe të tjerë jashtë vendit. Ndryshe nga vendet e tjera, ku secila shtëpi paguan për mirëmbajtje, në Koretin vullnet për mbështetje kanë shprehur mërgimtarët. Skënder Maka dhe Bajram Kelmendi janë dy punëtorët e fshatit që kujdesen për mirëmbajtjen e hapësirave publike. Shportat dhe kontejnerët janë të ndarë në shumë pjesë të fshatit.
Megjithatë, kryetari i fshatit, Sejdi Kurteshi, thotë se nuk janë të mjaftueshëm. Që Koretini ta ketë një lum të pastër, pa ujëra të zeza dhe pa mbeturina, kjo mbetet të shihet nga vullneti i fshatrave tjerë dhe nga investimet që do të bëjë Komuna e Kamenicës.
