Richard Grenell, emisar i presidentit Donald Trump për misione speciale në botë, ka shpërndarë sonte një qëndrim në X, ku Kurti cilësohet si person kundër interesave amerikane në Ballkan dhe kundër paqes.
Emisari presidencial ka vendosur të shpërndajë sot një postim të Fitim Çekut në rrjetin social X, ku thuhet se Kurti është kundër interesave amerikane në Ballkan.
Ky postim po ashtu ka bashkëngjitur edhe raportimin e Associated Press për zvarritjen dhe bllokadën që po ndodh në Kuvendin e Kosovës, si rrjedhojë e mungesës së numrave për partinë e Albin Kurtit.
”Albin Kurti tani nuk e ka shumicën parlamentare”, shkruan Çeku në postimin që u shpërnda nga emisari Grenell.
”Ai është kundër interesave amerikane në Ballkan. Ai është kundër paqes në Ballkan dhe opozita nuk duhet t’i japë votat për qeverinë e re”, thuhet më tej në këtë postim.
Kjo nuk është hera e parë që emisari presidencial reagon në lidhje me Kosovën dhe specifikisht për kryeministrin në detyrë Kurti. Grenell para zgjedhjeve u shpreh se Kurti ishte i pabesueshëm edhe për administratën Biden si dhe atë Trump në mandatin e parë. Emisari ishte i qartë në atë se administrata e re amerikane nuk dëshiron të bashkëpunojë me të sepse nuk i beson.
