Humanisti i njohur Halil Kastrati ka bërë të ditur se në Gjilan është drejt përfundimit një projekt madhështor, i cili pritet të ketë ndikim të drejtpërdrejtë në jetën e qytetarëve. Projekti përfshin një qendër ditore për të moshuar, një bujtinë për studentë dhe një kuzhinë humanitare, duke krijuar kështu një hapësirë me standarde të larta që do të shërbejë për kategoritë më të ndjeshme të shoqërisë.
Sipas Kastratit, kjo hapësirë do të jetë në funksion të të moshuarve që meritojnë kujdes e përkujdesje, studentëve që kanë nevojë për mbështetje gjatë studimeve, si dhe familjeve që përballen me vështirësi ekonomike dhe kanë nevojë për një shujtë të ngrohtë. “Gjilani po zbukurohet me një projekt madhështor! Një hapësirë që do të shërbejë për njerëzit tanë, për të moshuarit që meritojnë kujdes, për studentët dhe për çdo familje që ka nevojë për një shujtë të ngrohtë,” ka shkruar ai.
Ky projekt po vlerësohet si një investim human dhe social i një rëndësie të veçantë, që do t’i japë Gjilanit një dimension të ri në kujdesin për qytetarët dhe do të mbetet një shembull i përkushtimit dhe solidaritetit në shërbim të komunitetit.
