Lëvizje Vetëvendosje në Gjilan zyrtarizon ish-anëtarët e PDK-së si pjesë të ekipit të saj
Në janar të vitit 2022, Lëvizja Vetëvendosje dhe PDK arritën një koalicion në Gjilan për bashkëqeverisje, por ky bashkëpunim përfundoi në maj të vitit të kaluar. Pavarësisht prishjes së koalicionit, Leonora Morina-Bunjaku, Bajram Isufi dhe Enver Shabani, të cilët ishin pjesë e PDK-së, vazhduan të mbështesin qeverisjen e Alban Hysenit, kryetarit të Komunës nga LVV.
PDK reagoi ndaj këtij veprimi, duke marrë vendimin për t’i përjashtuar këta tre individë nga të gjitha pozitat partiake për shkak të mospërfilljes së vendimeve të partisë. Sot, Alban Hyseni, kryetari i Lëvizjes Vetëvendosje në Gjilan, prezantoi zyrtarisht Leonora Morina-Bunjakun, Bajram Isufin, Enver Shabanin dhe Erestina Isufin si anëtarët më të rinj të LVV-së.
Në postimin e tij, Hyseni theksoi kontributin e tyre në qeverisje, duke vlerësuar veçanërisht angazhimin e tyre në luftën kundër kundërligjshmërisë.
Postimi i plotë:
Leonora Morina Bunjaku, Erestina Isufi, Bajram Isufi dhe Enver Shabani janë bashkëpunëtorët me të cilët kemi kaluar shumë sfida në qeverisje.
Veçanërisht, sfida e madhe e luftimit të kundërligjshmërisë ka qenë testi ynë më i madh për këto tre vite, ku dëshmuam qëndrueshmëri dhe vendosmëri të palëkundur!
Jam mirënjohës për punën dhe angazhimin e tyre në qeverisjen lokale. Një rrugëtim e i ri po fillon – një rrugë ku parimet e punës së ndershme, luftës kundër së keqes dhe interesi publik na bashkojnë.
Mirë se vini në Lëvizjen VETËVENDOSJE!
