Kryetari i Komunës së Gjilanit, Lutfi Haziri, kishte publikuar para një muaji vendimin e tij për pakon emergjente në mbështetje ndaj familjeve dhe bizneseve.
Haziri ka paraparë që në këtë pako të pëfshihet lirimi i bizneseve nga qiraja, po ashtu edhe i familjeve që banojnë në objektë në pronësi të Komunës.
“Lirimi i bizneseve nga qiraja për gjashtë muaj rresht për pjesën që nuk mbulohet nga Qeveria, kafeteritë (vlen për të gjitha) që paguajnë taksë për shfrytëzimin e hapësirës publike (si terasa), do të lirohen nga pagesa vetëm për vitin 2020, lirimi nga qiraja për gjashtë muaj rresht vetëm familjeve që banojnë në objekte në pronësi të Komunës”,kishte shkruar Haziri.
Por, ky program nuk po i duket më i miri ish-kryetarit të Gjilanit, Qemajl Mustafa, i cili ka kritikuar mënyrën se si komuna ka paraparë pako emergjente. Qeverisjen e Hazirit e ka quajtur tallava teksa ka thënë se ai veç llafet i ka me bollëk.
Mustafa i ka kërkuar Hazirit që të paguaj komuna gjysmën e qërasë së biznesve gjilanase dhe të trajtoj siç duhet ekonomitë bujqësore dhe familjet në nevojë.
“Para rreth një muaji, menjëherë pas shpalljes së pakos financiare të qeverisë për Covid19, kryetari i komunës, Lutfi Haziri, si njeri që nuk i kursen llafet dhe i ka me bollëk e pa pare, doli dhe u zotue për me i asistue bizneset me gjysmën e mbetur të qërase sepse qeveria e mbulonte gjysmën tjetër për 3 muaj. Bile, ky e tha, do të paguhen për 6 muaj rresht. Perveç qërave, u zotua që ti asistoje familjet me nevoja emergjente ekzistenciale dhe ekonomitë bujqësore. Me këtë rast, kryetari bëri diskriminim publik sepse tha, familjet që banojnë në banesa te komunës do t’i lirojme nga qeraja. E çka halli me familjet tjera? Ato qindra familjet tjera që paguajnë qëra nëpër qytet e fshatra a nuk janë tonat?”, ka shkruar Mustafa në reagimin e tij. Ai ka thënë se Haziri me sjelljet e tij po mashtron publikun, teksa ka shtuar se qeveria lokale po bën diskriminim në mënyrë se si ka paraparë mbështetjen e biznesve në kohë pandemie.
“Pak më vonë, me 5 Maj, doli nënkryetari me disa nga drejtorët dhe nga kjo paraqitje e tyre u pa se kryetari i kishte “hëngër” llafet dhe i kishte ra pishman për zotimin per me ju pague bizneseve 50% të qërasë siç tha vet “për 6 muaj rresht”. Por, e bëri edhe një diskriminim.tjetër sepse thanë, do t’ju falim vetëm atyre bizneseve që punojnë në hapsirat e komunës. E çka me tjerat? Një gjë e di sigurtë. Kur e ka premtue pagesën e gjysmës së qërasë për bizneset kryetari nuk e ka dijtë as sa biznese aktive i ka në komunë, as sa biznese paguajnë qëra për hapsirat që i shfrytëzojnë e as sa është një qëra mesatare mujore për këto biznese”, ka thënë Mustafa në një postim të tij në “Facebook”, transmeton Plus Tv.
Mustafa ka paraqitur të dhëna se si do të ishte ndihma për bizneset në qoftë se qeveria lokale do të ishte më serioze në matjet e saj.
“Po e paraqes këtu një llogari të përafërt vetëm për rastin e qërave: Nëse komuna e jonë ka rreth 4000 biznese aktive (në vitin 2012/13 ka patur 3300) atëherë rreth 1000 biznese paguajnë qëra mujore për me e ushtrue aktivitetin e tyre. Pjesa më e madhe e bizneseve qëramarrëse janë të koncentruara në zonën urbane, pra, në qytet. Nëse qëraja mesatare është vetëm 300€ për muaj atëherë komunës i bie me pague 150€ për zotimin prej 50% të saj. Kjo do të thotë se për çdo muaj ajo duhet të paguaj 150000€ e për 6 muaj 900000€ (rreth 1 milion euro). Mund të jetë kjo shifër më pak ose më shumë e që varet nga statistika aktuale por bizneset dhe familjet duhet të trajtohen dinjitetshëm në këtë situatë e jo me improvizime”, përfundon Mustafa reagimin e tij.
