Për të parandaluar aksidentet rrugore, Ministria e Infrastrukturës do të vendosë, në muajin maj, radarë me kamera në çdo rrugë nacionale të Republikës së Kosovës.
Ekspertët e komunikacionit rrugor kanë thënë se fundi i shkurtit do të sjellë akullin e zi, ku mund të sjellë edhe fatalitete të tjera. Policia ka bërë apel për drejtuesit e automjeteve që të kenë kujdes, sidomos në orët e hershme të mëngjesit, ku për shkak të kohës se ftohtë ka ngrica në rrugë.
Eksperti i komunikacionit, Nol Dedaj, ka vlerësuar se institucionet e vendit nuk janë fare të përgatitura sa i përket masave mbrojtëse nga aksidentet rrugore.
Ai ka thënë se drejtuesit e automjeteve në Kosovë kanë mungesë të informacioneve dhe gjatë ngasjes së veturës nuk e kanë të ditur se çka do t’u ndodhë në momente të caktuara.
“Nga fundi i muajit të dytë pritet të ndodhë akulli i zi, që drejtuesit dhe popullata nuk janë të informuar se ky faktor mund të sjellë aksidente me pasoja fatale. Në disa vende të Kosovës, ku janë temperaturat e ulëta, bëhet avull dhe ka mjegulla të dendura, në ato raste paraqitet akulli i zi. Do t’i përmendi vetëm dy pika, rruga e Sllatinës dhe rruga e Mazgitit ku shkon për Obiliq, këtu është pasiguri dhe rrezikshmëria për fatalitet është e madhe. Kjo është mungesë e institucioneve tona, të cilat nuk kanë bërë kurrë analiza”, ka thënë ai për “Radio Kosovën”.
Ai ka theksuar e duhet bërë aplikacione ku drejtuesit e automjeteve mund të marrin informacione në mënyrë elektronike për pika të caktuara të rrugës që nuk janë të identifikuara.
Për të parandaluar aksidentet me fatalitet, Ministria e Infrastrukturës këtë vit ka bërë një marrëveshje me Qeverinë hungareze për implementimin e sistemit inteligjent të menaxhimit të komunikacionit rrugor. Zëvendësministri Rexhep Kadriu, i ka thënë “Radio Kosovës” se nga muaji maj, në çdo rrugë nacionale të Republikës së Kosovës do të vendosen radarë me kamera.
“Në muajin prill apo maj do të vendosim radarë me kamera nëpër rrugët nacionale të Republikës së Kosovës. Mirëpo, gjatë 2018 kemi bërë përpjekje të mëdha që rrugët tona të kenë një sinjalistikë rrugore të mirë. Ne tash e kemi dyfishuar buxhetin, që shkon në 4 milionë, për investime në sinjalistikë rrugore”, ka thënë ai.
Kadriu ka thënë se Ministria e Infrastrukturës në bazë të kontratave që ka pasur me operatorët ekonomikë, ka vendosur edhe vija anësore të bardha pas shumë viteve, por, siç thotë ai, nuk janë përfunduar të gjitha e që pritet të përfundohen në përmirësimin e kohës në pranverë.Ndërsa, zëdhënësi i Policisë së Kosovës, Baki Kelani, u ka bërë apel drejtuesve të automjeteve të kenë kujdes në rrugë, sidomos në orët e hershme të mëngjesit, ku mund të ketë ngrica për shkak të kushteve atmosferike.
Ai tregoi se me rastin e shënimit të vitit të ri ka pasur dy aksidente me pasoja fatale.Statistikat e përgjithshme për datën 31dhjetor, kanë evidentuar dy aksidente me pasoja fatale. Data 1 janar, ka kaluar pa aksidente fatale ndërsa me datën 2 ka ndodhur një aksident në një fshat të Suharekës, ku një person ka goditur një këmbësor dhe si pasojë e goditjes, personi ka ndërruar jetë”, ka thënë ai.Kujtojmë se numri i aksidenteve me fatalitet në Kosovë ka qenë shumë shqetësues. Brenda vitit 2018 kanë humbur jetën 110 persona.
