Ish futbollisti i mirënjohur Xhelal Jetishi, ka bërë të ditur se sot ka ndërruar jetë ish futbollisti Maksut Maksuti.
Maksuti ka qenë ish lojtar i skuadrës, siç quhej në vitet e 70-ta Cërvena Zvezda e Gjilanit, në të cilin kolektiv ka luajtur edhe Jetishi për shumë vite.
“Të nderuar bashkëqytetar, miq, shok, sportist, …!, për çdo ditë qyteti ynë është duke humbur njerëz të mirë, sot na iku edhe prof. Maksut Maksuti.
Njeriun nuk e bënë me vlerë fama edhe pse ishe një ndër profesorët e parë dhe një ndër profesorët më të njohur të Edukatës fizike e as pasuria materiale edhe pse kishit një jetë solide. Njeriun e bënë me vlera të mëdha pasuria e shpirtit të tij, mirësia që ai e mban në zemër, dashuria që ai përçon tek të tjerët dhe veprat shembullore që ai i ka e të cilat ndikojnë tek komuniteti dhe bëjnë që edhe të tjerët të ndikohen nga këto vepra dhe të ndjekin shembullin e njeriut përparimtar. Shembull i tillë dhe personalitet unik i shoqërisë ishit Ju, kujdestari im Maksut Maksuti.
Dheu i kësaj toke pas një kohe do të tret gjithçka, por kësaj tretje dhe këtij harrimi do t’i rezistoj vetëm fjala e ëmbël dhe vepra e mirë. Perëndia shpirtrat e njerëzve i bëri të pavdekshëm, por shpirtrave të njerëzve të drejtë, përveç pavdekësisë ju dha edhe atributin hyjnorë
Me pasion i kujtoj te gjithë mësimdhënësit, mësimet e të cilëve, ndezën zjarrin e një dëshire te madhe brenda meje, për të ndjek rrugën e tyre. Kam ecur nën hijen e madhështisë se tyre dhe i respektoj që të gjithë pa dyshim, por mësuesi im kujdestar Maksut Maksuti do të mbetet në majën e hierarkisë së respektit njerëzor.
Ngushëllime të sinqerta familjarëve të pedagogut të nderuar. Po ashtu ngushëllime të sinqerta edhe qytetarëve të Gjilanit, sportistëve shokëve dhe miqve të të ndjerit.
I qoftë dheu i lehtë!”, shkruan Jetishi në profilin e tij në facebook.
