Drejtori i Drejtorisë për Mbrojtje dhe Shpëtim në Komunën e Rahovecit, Kujtim Dina ka lënë postin e tij për të vazhduar me punë jashtë vendit.
Lajmin e ka bërë të ditur kryetari i Rahovecit, Smajl Latifi përmes një postimi në rrjetin social, Facebook.
Latifi tha se Dina ka kërkuar të lirohet nga pozita, derisa shton se ai do të vazhdojë punën jashtë vendit më konkretisht në Gjermani.
Postimi i plotë:
Pas kërkesës për lirim nga detyra e Drejtorit të Drejtorisë për Mbrojtje dhe Shpëtim, sot kam liruar nga kjo pozitë, z. Kujtim Dina.
Për gjashtë muaj në këtë pozitë, Kujtimi ka dëshmuar se është një koleg dhe bashkëpunëtor i mirë, e me kontributin e çmueshëm që ka dhënë si dhe me punën e përkushtuar që ka treguar, jam i bindur se, ai i ka kryer mirë dhe me nder detyrat dhe shërbimet ndaj qytetarëve në kuadër të përgjegjësive të tij, për çka unë e falënderoj sinqerisht dhe i uroj atij mbarësi dhe suksese në të ardhmen.
Kërkesa për lirim nga kjo pozitë ka të bëjë me arsye familjare dhe profesionale të Kujtimit, i cili ka vendosur t’i bashkëngjitet familjes për të qëndruar e vazhduar me punë jashtë vendit, në Gjermani.
Shëndet dhe gjithë të mirat, kolegu dhe miku im i mirë, z. Kujtim Dina!
