Nga Lëvizja Vetëvendosje, pas takimit të sotëm në mes të kreut të partisë, Albin Kurtit, me ish-kryeministrin, Isa Mustafa, kanë treguar se dy liderët janë pajtuar për modalitetin e parë për atë se si do të duket kabineti qeverisës prej 12 ministrive, meqenëse ishin propozuar dy të tillë nga grupet punuese, shkruan Gazeta Express.
“Nga dy modalitetet e ndryshme për kabinetin qeverisës me 12 ministri, që i kishin ofruar ekipet punuese të dy subjekteve tona, Kurti dhe Mustafa u përcaktuan për verzionin e parë”, thuhej në njoftimin e VV’së.
Por cili është modaliteti i zvogëlimit të numrit të ministrive nga 21 në 12, aq sa kanë premtuar këto dy parti.
Për këtë çështje në emisionin Pressing kishte folur deputeti i LDK’së, Lumir Abdixhiku, i cili kishte qenë edhe pjesë e grupeve punuese.
Sipas këtij modaliteti të parë për të cilin janë pajtuar Mustafa e Kurti, Ministria e Drejtësisë, Ministria e Arsimit, Shëndetësisë, Mbrojtjes, ajo për Kthim dhe Ministrai e Kulturës e Sportit do të mbesin siç kanë qenë.
Ndërkohë në Ministrinë e Punëve të Jashtme do të bëhen bashkë Ministria për Integrime dhe ajo e Diasporës.
Në Ministrinë për Ekonomi dhe Zhvillim, do të përfshihen Ministria e Tregtisë dhe Industrisë ajo e Inovacionit, Ministria e Ekonomisë dhe Ministria për Punë.
Në Ministrinë e Infrastrukturës do të bëhen bashkë Ministria e Ambientit dhe Planifikimit Hapësinor.
Ministria e Financave do të bashkohet me pjesën e ndarë të Mirëqenies Sociale.
Saktësisht Ministria e Punës dhe Mirëqenies Sociale do të ndahet në dysh, pjesa e Punës i bashkohet Ministrisë për Ekonomi dhe Zhvillim, ndërsa pjesa e Mirëqenies Sociale i bashkohet Ministrisë së Financave.
Në Ministrinë e Punëve të Brendshme do të bëhen bashkë ministria e Administratës Publike dhe ajo e Pushtetit Lokal.
Dhe në fund do të mbetet Ministria për Bujqësi.
Ndërkohë faza e fundit para nënshkrimit të koalicionit do të jetë edhe ndarja e përgjegjësive në qeveri. Koalicioni mes dy partive pritet që të nënshkruhet të hënën./GazetaExpress/
