Komisioni për Administratë Publike, Pushtet Lokal, Media dhe Zhvillim Rajonal bashkëbisedon me qytetarë të Ferizajt dhe Gjilanit lidhur me Projektligjin për KPM-në
Në vazhdën e dëgjimeve publike me qytetarë të komunave të ndryshme të Kosovës lidhur me Projektligjin për Komisionin e Pavarur të Mediave, anëtarë të Komisionit për Administratë Publike, Pushtet Lokal, Media dhe Zhvillim Rajonal, nën udhëheqjen e kryetarit Valon Ramadani qëndruan sot në Ferizaj dhe Gjilan.
Në sallat e kuvendeve komunale të këtyre dy qyteteve ligjvënësit dëgjuan propozimet dhe vërejtjet e qytetarëve, përfaqësuesve të shoqërisë civile e të mediave lidhur me projektligjin në diskutim.
Deputetët po ashtu u përgjigjen në pyetjet e të pranishmëve përkitazi aspekteve të ndryshme përmbajtësore të projektligjit dhe qëllimit të tij në tërësi.
Një vëmendje të posaçme mori diskutimi lidhur me lajmet e rreme dhe nevojën e kodifikimit të kësaj problematike me qëllim të luftimit të kësaj dukurie, si sfidë jo vetëm vendore, por globale, mbrojtjen e fëmijëve nga ekspozimi ndaj produkteve të ndryshme mediatike e te platformave të tjera digjitale në shpërputhje me moshën e tyre etj.
I diskutua gjithashtu lidhur me lartësinë e gjobale që parasheh drafti i ligjit.
Nga diskutues të ndryshëm u ngrit edhe çështja e mungesës së gazetave të shtypura ditore dhe nevojës për rikthimin te lexuesi edhe të këtij mjeti të informimit, pavarësisht zhvillimit të teknologjisë dhe platformave digjitale.
Duke falënderuar pjesëmarrësit për kontributin e tyre kryetari i Komisionit, Valon Ramadani theksoi se komisioni ka vendosur të dëgjojë nga afër mendimet e qytetarëve dhe të akterëve të tjerë, si dhe të marrë në konsideratë kontributin e gjithsecilit në funksion të hartimit të një ligji sa më përmbajtjesor dhe që përmbush e adresat zbrastërisat e deritanishme në fushën të cilën e mbulon.
Dëgjimet publike për këtë projektligj do të vazhdojë edhe gjatë javës së ardhshme në qendra të tjera të Kosovës.
