Pajisja e kosovarëve me pasaporta po vijon të jetë një problem që po vazhdon edhe në vitin 2023.
Pavarësisht kontratës së firmosur për pasaporta dhe dokumente të tjera dhjetorin që lamë pas, ende nuk ka startuar pajisja e qytetarëve të Kosovës me to, pikërisht për shkak të mungesës së materialit, raporton Paparaci.
Ndërkohë për këtë çështje, ministri i Brendshëm, Xhelal Sveçla ka kërkuar nga shteti i Gjermanisë që të lejojë hyrjen e qytetarëve të Kosovës që u ka skaduar pasaporta.
Sveçla përmes një letre drejtuar autoriteteve gjermane e të cilën e ka siguruar KALLXO.com, ka kërkuar që të lejohen qytetarët e Kosovës të cilët kanë një leje qëndrimi të vlefshme në Gjermani dhe të marrin shërbime me pasaportë të skaduar të Kosovës.
Ai ka kërkuar që shtetasit kosovarë me leje qëndrimi të vlefshme në Gjermani të mund të kthehen nga Kosova në Gjermani pavarësisht skadimit të pasaportës kosovare.
Sveçla ka kërkuar që këto masa të vlejnë në muajin qershor 2023, ose më herët nëse zgjidhet çështja e mungesës së materialit për dokumente identifikuese.
Në fillim të letrës thuhet se fillimisht për shkak të çështjeve të zingjirit të furnizimit të shkaktuara nga mungesa e materialeve si rezultat pandemisë e më pas edhe luftës në Ukrainë, Kosova si shumë vende të tjera janë duke u përballur me mungesë të materialit për dokumente identifikuese.
Rrjedhimisht, kosovarët mund të ballafaqohen me këtë problem edhe në muajt e ardhshëm.
Qytetarët e Kosovës në të njëjtën kohë rrezikojnë të mbesin pa pasaporta deri në muajin qershor. Sidoqoftë, ende nuk dihet nëse MPB-ja ka marrë përgjigje nga shteti gjerman mbi këtë temë.
Nga ana tjetër, hera e fundit kur i pari i MPB-së foli publikisht për çështjen e pasaportave ishte nëntori i vitit të kaluar.
Sipas deklaratës së Sveçlës në Kuvendin e Kosovës, pajisja me pasaporta do të mund të bëhej tek në janarin e vitit 2023. Por, as kjo nuk ka ndodhur deri më tani, shkruan Paparaci.
“Ministria e Punëve të Brendshme është në pritje për furnizim me dokumente personale, ku fillimisht në fund të këtij muaji do të furnizohemi me patentë shofer e letërnjoftime dhe pas dy muajve me pasaporta, gjithsej 73 mijë cope”, thoshte Sveçla, më 17 nëntor të 2022-s.
“Çfarë ka bërë Agjencia e Regjistrimit Civil, është që duke pasur parasysh numrin e limituar të dokumenteve që i kemi në dispozicion, kanë prioritizuar lëshimin e dokumenteve për kategori me urgjencë, që do të thotë rastet e sëmundjeve, rastet e bashkimeve familjare, rastet e aktiviteteve sportive, diplomacia e këto kategori kanë prioritet, kurse për qytetarët e tjerë më vjen keq, por duhet t’ju përshtatemi rrethanave në të cilat po jetojmë dhe unë jam duke punuar jashtëzakonisht shumë edhe me kompaninë qe ajo sa më parë të sigurojë, të furnizojë vetveten me lëndën e parë dhe pastaj me dokumentacionin e nevojshëm për ta sjellë në Kosovë”.
Për letrën e Sveçlës ndaj autoriteteve gjermane ka reaguar edhe nënkryetarja e PDK-së, Vlora Çitaku.
Ajo ka thënë se shpreson që një gjë e tillë nuk është e vërtetë.
Kjo pasi sipas saj, ne nuk jemi në gjendje të jashtëzakonshme e as në ndonjë luftë.
“Po lexoj raportime në media se Ministri Svecla paska bërë kërkesë që të lejohet hyrja e shtetasve të Kosovës në Gjjermani, me pasaporta të skaduara. Shumë po kam dëshirë me besu që nuk është e vërtetë. Në gjendje të jashtëzakonshme nuk jemi. As luftë e as pandemi nuk ka”, shkroi ajo me anë të një postimi në Facebook.
“Këtë punë e ka qeveria. Me mbledhë taksa dhe me ofru shërbime. Fjalimet mediokre filozofike nuk kryejnë punë në qeverisje”, përfundoi Çitaku./Paparaci/
