Drejtori i Përgjithshëm i Policisë së Kosovës, Gazmend Hoxha ka treguar se çka është gjetur sot, më 30.11.2024, në baritjes që u zhvilluar në veri të Kosovës.
Hoxha ka thënë se në 10 lokacionet që u kryen bastisjet pas sulmit terrorist në Ibër-Lepenc janë gjetur mbi 200 uniforma ushtarake, gjashtë zolla nga të cilat tri janë të përdorura, tri granata dore, dy armë automatike AK-47, një revole, municione të kalibrave të ndryshëm, pjesë të armëve, fitila ndezës për inicim të lëndëve plasëse, helmeta ushtarake, maska thika, të holla në euro dhe në dinarë dhe pajisje të tjera.
Madje, ai tha se në një rast të ndarë në Zveçan janë gjetur dy armë automatike AK-47, tri revole, një armë e gjuetisë, dy armë dekorative, gjashtë karikatorë të AK-47, municione të kalibareve të ndryshëm, uniforma ushtarake, pjesë e sipërme e uniformës së Policisë së Kosovës.
Në mesin e gjërave të konfiskuara shihet edhe një emblemë e UÇK-së, që tregon se në operacionet terroriste, që ishin planifikuar të kryheshin, ishin paraparë edhe skenarë për përfshirjen e ish UÇK-së.
Në anën tjetër, ministri i Punëve të Brendshme, Xhelal Sveçla ka thënë se që nga mëngjesi i sotëm, 30.11.2024, janë arrestuar dhe shoqëruar në Policinë e Kosovës tetë persona.
“Siç është bërë e ditur pas hetimeve intensive sot në orët e mëngjesit në 10 lokacione janë realizuar kontrolle me ç’rast janë arrestuar dhe shoqëruar në stacione policore 8 persona të dyshuar për përfshirje në veprime kriminale e terroriste”, tha Sveçla.
Operacioni i sotëm vjen pas sulmeve të fundit me granata ndaj institucioneve në veri, e që kulmoi me sulmin terrorist me material shpërthyes në kanalin e Ibër – Lepencit mbrëmjen e së premtes. /Telegrafi/
