Të gjithë jemi ende të pikëlluar dhe të mërzitur nga ndeshja e mbrëmshme në stadiumin “Fadil Vokrri”. Megjithatë, kryeministri Albin Kurti thekson se emocionet pozitive që ka dhuruar përfaqësuesja jonë janë të jashtëzakonshme.
“Fakti që ishim kaq pranë kualifikimit tregon sa afër madhështisë jemi. Tash na vlon meraku kolektiv: do të mund të bëhej kështu sikur t’ia kishim bërë ashtu, ky apo ai, ose që të dy… Por le të mos harrojmë që përfaqësuesja jonë na ka bërë krenarë aq shumë sa t’u jemi mirënjohës përgjithmonë e përkrah përherë”, tha kryeministri.
Ai shtoi se edhe pse rezultati nuk ishte ai që të gjithë e dëshironim, përpjekja e lojtarëve dhe stafi meriton vlerësim maksimal: “Faleminderit të gjithë lojtarëve, trajnerit dhe stafit për angazhimin e madh në secilën ndeshje. Andaj edhe sot e çdo ditë tjetër, forca Kosovë!”
Ky reagim nënvizon mbështetjen e vazhdueshme të institucioneve dhe publikut ndaj përfaqësueses, duke theksuar se Kosova është shumë pranë arritjeve të mëdha në futbollin ndërkombëtar.
